Forbes gikuhang sparmate ni Pacman

CEBU, Philippines - Gikaharung ni Manny Pacquiao ang kanhi IBF super featherweight champion Steve Forbes sa iyang sparring session nga lakip sa iyang pagpangandam sa iyang sangka batok ni Joshua Clottey karong Marso 13 sa Dallas Cowboys Stadium sa Arlington, Texas. 

Sa taho sa boxingscene.com, si Pacquiao mipahigayun og siyam ka round nga sparring batok ni Forbes kinsa giila nga usa sa mga ngilngig nga boksidor sa welterweight division.

Nailhan si Forbes human sa iyang sangka batok sa duha ka mga dagkung pangan sa welterweight division nga naglakip nila ni legendary boxing icon Oscar De La Hoya ug ang WBC welterweight champion Andre Berto.

Ang conditioning coach ni Pacquiao nga si Alex Ariza mihulagway nga nakuha na ni Pacquiao ang hustong kondisyon nga nakita sa iyang nindot nga performance sa sparring sessions.

Gawas ni Forbes, nakig-spar usab si Pacquiao batok ni Raymund Beltran kinsa usa sa mga regular nga sparmate sa pambansang kamao.

Dugang pa ni Ariza nga sa nakita niyang kusog karon ni Pacquiao, wala nay boksidor sa welterweight nga makahimo pagpilde ni Pacquiao, kini naglakip nila ni Floyd Mayweather ug Shane Mosley. - BANAT NEWS