2nd Cebu Rotary Run mosikad na karon

CEBU, Philippines - Manalipod na sa ilang tagsa-tagsa ka titulo sila si Simon Losiaboi ug Mary Grace de los Santos sa pagsikad sa 2nd Cebu Rotary Run sayo sa buntag karong adlawa diha sa SM City-Cebu grounds.

Uban ni Losiaboi ug Delos Santos nga modagan ang liboan ka mga running enthusiasts. Kini naglakip ni RP Ironman king Joy Jopson, ABS-CBN TV Patrol news anchor Atty. Haidee Acuña ug ang 74-anyos nga si Renning Ylaya nga modagan ubos sa 15K run.

Ang lumba gibahin sa upat ka kategoriya -- 15K, 7K,3K ug 200m kiddie dash. Gilakip sab ang dogathon division nga salmotan sa mga runners, kinsa modagan uban sa ilang mga iro.

Ganting salapi ang nagpaabot alang sa mga mananaog sa 15K ug 7K run, samtang gift packs ang madawat sa mga mananaog sa 3K, Kiddie Dash ug dogathon.

Ang makampiyon sa 15K mobulsa og P8,000, samtang ang makampiyon sa 7K makadawat og P5,000.

Ang kuwarta nga matigom sa maong lumba itabang ngadto sa mga kaigsuonan nga may sakit og polio.

Gipasiugdahan kini sa Rotary International District 3860 sa abag sa Cebu Parklane International Hotel, Jollibee, SM City Cebu, Metro Grafix, Alcordo Advertising ug Summit Natural Drinking Water.   (BANATNEWS)