Run With A Smile mosikad na

CEBU, Philippines - Gatosan ka runners ang modagan sa “Run With A Smile” sayo ning buntag diha sa The Terraces grounds sa Ayala Center-Cebu.

Ang lumba nga maoy mobukas sa kasaulogan sa Dental Health Month salmotan sab sa mga dekalibreng runners nga mag-ilog sa titulo sa 10K ug 5K runs. Mga fun runners gikan sa mga nagkadaiyang dental schools sa Sugbu nga naglakip sa Cebu Doctors University, Southwestern University ug University of the Visayas ang moapil sab og dagan.

Sa gihapon, sila si Simon Losiaboi ug Mary Grace Delos Santos nagpabilin gihapon nga paborito nga maoy modaog sa lumba.

Lakip sa mga running personality nga modagan mao si ABS-CBN TV News Anchor Atty. Haidee Acuña ug ang running couple nga sila si Dr. Yong Larrazabal ug Donna Cruz-Larrazabal.

Ang top three finisher sa 10K Open makadawat og P3,000, ang second placer makaangkon og P2,000 ug ang third placer mobulsa og P1,000.

Gawas sa 10K, 5K ug 3K Open, usa sa makapa-enganyo karon mao ang couples category.

Ang Cebu Dental Association nga maoy tigpasiugda sa maong lumba, mipahibalo nga gawas sa pag-promote sa running isip ehersisyo, gigamit usab nila ang lumba nga kalihukan aron handumon ang Adlaw sa Kasingkasing.   (BANATNEWS)