Cebu City Niños dili na kapugngan

CEBU, Philippines - Padayon gihapon nga mikabkab og mga bulawang medalya ang Cebu City Niños sa 2010 Central Visayas Regional Athletic Association (CVIRAA) Meet kagahapon didto sa Danao City.

Ang gamhanang Niños dili na gyud kapugngan sa ilang tinguha pagtungtong sa hataas nga dapit sa overall standing, ma-medal count o actual accumulated points ang subayon.

Ang Niños nakatigom na og 300 puntos, samtang ang Cebu Province miambak sa ikaduha uban ang 210 puntos. Ang Bohol mikatkat sa ikatulo sa ilang 129.5 puntos, samtang ang Dumaguete City nanaog ngadto sa ikaupat sa ilang 80 puntos.

Ang uban pang delegasyon nga misalmot mao ang Mandaue (55 pts.), Negros Oriental (14 pts.), Tagbilaran, (26 pts.), Talisay (19 pts.), Siquijor (12 pts.), Bayawan (5.5 pts.), Danao (5 pts.) ug ang Bogo (2 pts.)

Ang pambato sa Niños sa elementary level mihakot og 117 puntos, samtang ang ilang secondary counterparts mitunol og 105 puntos.

Sa katapusang adlaw sa athletics competition didto sa Ramon Durano Sr. Memorial Sports Complex, ang Niños nakadaginot pa og tulo ka bulawan sa secondary relay events.

Sa sipa, ang Niños mikubkob og bulawan human gipilde ang Negros Oriental, samtang ang Cebu City jins, arnisadors, tennis players, table netters ug hoopsters mipakita sab og maayong labok.

Ang Niños mihakot og unom ka gold sa arnis, samtang ang managsuong Tormis mitunol og golds sa ilang tagsa-tagsa ka duwa sa table tennis. Si Danel Jay Tormis mipukan sa iyang teammate Stephen Jaca, 11-8, 9-11, 11-5, 11-6, 11-5, samtang ang iyang igsuong si Elona Jane yano kaayong midaog batok ni Jeanny Kaye Pepito aron langkaton ang bulawan sa secondary girls singles.

Ang mga masaarong jins sa Niños mitunol sab og mga bulawan kortesiya nilang John Paul Tomarse, Jeah Maglasang, Charles Labiste, Hannah Mae Taneo ug poomsae bets Rinna Babanto ug Claire Panaginip.

Sa tennis, si Palarong Pambansa champion Niño Siso mipukan ni Fritz Satera sa Cebu Province, 8-2 sa boys singles finals, samtang si Kimberly Uytico mipatigbabaw batok sa laing Cebu Province netter Chrissiane Mae Kintanar, 8-5 sa girls final.

Sa basketball didto sa Sabang multi-purpose gym, ang Niños nga gibitoonan sa University of the Visayas (UV) Baby Lancers ni coach Jun Pepito milubong sa Bohol, 84-67 aron pagsakmit sa bulawan sa secondary division. – BANAT NEWS