CVIRAA banatan na

CEBU, Philippines - Sugdan na sa Team Cebu City ang ilang kampanya pagdepensa sa korona sa pagsugod sa aksiyon sa 2010 Central Visayas Regional Athletic Association (CVIRAA) karong adlawa sa managlahing binyu didto sa Danao City.  

Sukad pa niadtong 1993, wala pay nakapilde sa gamhanang Cebu City sa overall championship sa tinuig nga kompetisyon nga gisalmotan sa nagkadaiyang school-based athletes sa elementary ug secondary levels.

Bisan og giusab na sa Department of Education (DepED) gikan sa medal count ngadto sa point system, wala gihapon matarog ang Cebu City hinungdan nga giila kini nga labing lig-on nga team sa CVIRAA.

Hinuon karong tuiga, daku ang paglaum sa ubang koponan nga mohimo og upset batok sa Cebu City. Lakip sa mosuway pagpalagpot sa Cebu City sa ilang trono mao ang mga delegado gikan sa Cebu Province, Dumaguete City ug Oriental Negros.

Ang Cebu Province inay nga magkalig-on, nagkahuyang hinuon human sa pagbuwag sa Danao, Bogo, Carcar ug Naga nga mitukod og ilang tagsa-tagsa ka koponan.

Sama sa Cebu Province, gibiyaan usab sa Bais, Bayawan ug Tanjay ang Oriental Negros, samtang ang Dumaguete magsalig lang sa ilang swimming ug volleyball team nga mohatod og daog alang sa ilang koponan.

Ang Bohol, Lapu-Lapu, Mandaue, Siquijor, Tagbilaran City, Talisay City ug Toledo City maoy mokompleto sa mga delegado.

Si DepEd regional director Recaredo Borgonia nanghinaot nga mapakita sa mga atleta ang ilang katakus sa CVIRAA diin kuhaon nila ang adunay mga potensiyal aron morepresentar sa rehiyon 7 sa umaabot nga Palarong Pambansa nga gikatakda sa Abril 11-17 didto sa Tarlac City.

Gawas sa Liloan ug Cebu City Sports Center nga maoy mo-host sa tennis ug swimming, ang tanang events adto ipahigayon sa Danao City.   (BANATNEWS)