Sol Meat mi-ihaw sa MBC-Mandaue

CEBU, Philippines - Duha ka ex-M. Lhuillier cagers ang mipuntos og daku sa kadaugan sa Sol Meat batok sa MBC-Mandaue, 84-77 sa Open Commercial division sa Agus Basketball Association (ABA) Fiesta Cup 2010 niadtong Domingo diha sa Barangay Agus gym, dakbayan sa Lapu-Lapu.

Sila si Danny delos Santos ug Ronald Paraiso nga gikuhang imports sa Sol Meat ni team owner Sol Bascon maoy nangulo sa kadaugan nga nagkumboya og 43 puntos. Si delos Santos mitimang og 23 puntos, samtang si Paraiso miambit og 20 puntos.

Nagbukalbukal na sa kainit ang opensiba sa Sol Meat pagsugod pa lang sa engkuwentro ug ilang gipahamtangan og 14 puntos nga lubong ang MBC-Mandaue sa first quarter, 32-18.

Ang MBC-Mandaue ubos sa pagpangulo ni Jeremy Espina, mi-rally sa second quarter aron laslasan sa halftime, 42-49. Apan ang Sol Meat nahigmata ug mipakita sa ilang tinuoray nga taras aron kontrolahon ang duwa hangtod nga naangkon ang makutas nga kadaugan.

Si Ampor Tabar mirehistro sab og double digits alang sa kadaugan sa Sol Meat pinaagi sa iyang 18 puntos.

Sila si Espina ug Jessie Lumantas misansan sab og 18 puntos matag usa aron pangulohan ang MBC-Mandaue.

Sa laing bahin, ang Janrymyl Bakeshop mikulit sab og daog batok sa Tango sa iskor nga 91-86 sa LLBA Club category niadtong Biyernes.

Nag-wild og maayo si Rene Daño, kinsa mirehistro sa iyang game-high 43 puntos aron pangulohan ang Janrymyl Bakeshop. Laing tulo ang mihikay og double figures. Si Digo Tampus mihaon og 20 puntos, gisundan ni Jimboy Igot sa iyang 15 puntos ug Robert Tampus nga adunay 14 puntos.

Ang natakilpo nga Tango gipangulohan sab ni J. Lomonggo, kinsa milansang og 24 puntos. Sila si Rene Cuadra ug Lordet Jornales misadsad og 20 puntos matag usa alang sa Tango.

Ang Agus Fiesta Cup 2010 gipaluyohan sab ni Agus Brgy. Capt. Joven Lauron, Councilor Jimboy Igot, Digo Tampus, Aqua Jamilla ug Jems Sportswear.

Puntos Matag Usa

JANRYLMYL (91) - Daño 43, D. Tampus 20, Igot 15, R. Tampus 14, Sagarino 5

TANGO (86) - Lomonggo 24, Jornales 20, Cuadra 20, Fuentes 16, Gutib 8, Pardillo 4, Ouano 4

SOL MEAT (84) - Delos Santos 23, Paraiso 20, Tabar 18, Tom 10, Iglamo 8, Aniñon 8, Reyes 8, Basmayor 4, Cabrilles 3

MBC-MANDAUE (77) - Espina 18, Lumantas 18, Rosal 12, Tabasa 9, Villarin 8, Mendoza 7, Abella 7, Dinnison 6, Inok 2. – BANAT NEWS