Lawis, Lomar, San Roque milubong sa ilang kontra
CEBU, Philippines - Gilubong sa Lawis ang San Miguel-A, 146-126 aron sakmiton ang solong liderato sa Northern division sa SK-FDH hoopfest 2010 niadtong Domingo diha sa Mayor’s Barangay Satellite Complex sa Brgy. Lorega, ning siyudad.
Ang Lawis, kinsa mikulit og tournament-high 146 puntos, miposte sa ilang ikatulong sunod-sunod nga kadaugan.
Si Bryan Ruelan mipabuhagay og 34 puntos aron pangulohan ang Lawis. Si Jay-r Hassamal mipabuto og 22 puntos, samtang si Mark Cuizon mipunting og 20 puntos.
Ang pilderong San Miguel A gipangulohan ni Francis Rafols, kinsa mibugha og 33 puntos, gisundan ni Francis Cuevan nga adunay 30 puntos ug Anthony Falcon nga mipugnit og 25 puntos.
Sa laing mga duwa, ang San Roque ug Lomar milaksi na gyud og daog human gipangpilde ang tagsa-tagsa nila ka mga kaatbang.
Ang San Roque milubong sa San Miguel B sa iskor nga 80-64, samtang gilubong sab sa Lomar ang Echavez sa iskor nga 95-72.
Sila si William Mabaga ug Martin Coyoca nagkumboya og 32 puntos aron pangulohan ang Lomar, samtang ang naparot nga Echavez gipangulohan ni John Mark Reynes, kinsa mi-iskor og 26 puntos. (BANATNEWS)
- Latest
- Trending
