PTT-UV kaging sa San Marino-USC sa Partner's Cup

CEBU, Philippines - Gipakuratan sa San Marino Corned Tuna-USC Warriors ang mas paboritong PTT Fuels-UV Lancers pinaagi sa pag-iskor og 78-74 nga kadaugan sa nagpadayong CESAFI Partners’ Cup niadtong Domingo diha sa Cebu Coliseum.

Pirmeng sikit ang duwa sa duha ka kampo, apan mikagar ang tirada sa Warriors sa daginutong segundos. Maayo na lang gani kay ila kining nabawi   pinaagi sa unom ka sunod-sunod nga free throws nga maoy nakapadaog kanila.

Tungod sa dakung upset, ang Warriors nagbitbit na karon og 1-1 nga baraha human sab sila mapilde sa Jaguars sa opening day.

Si Joven Cid Cortes maoy naghatag og balik sa labaw ngadto sa Warriors sa iyang usa ka free throw, 73-72 sa katapusang 1:59 sa duwa. Laing upat ka puntos gikan sa free throws gikan nilang Francis Luigi Bercede ug Sam Hermosa maoy nakapaluag sa dughan sa Warriors tungod kay mao kini ang nakainat sa labaw ngadto sa singko puntos, 77-72 sa nahabiling 1:09 sa regulasyon.

Sa ilang ball possession, wala makapasulod si Harold Cincoflores sa UV sa iyang duha ka free throws sa katapusang 56.4 segundos nga naghatag og dakung paglaum sa Warriors.

Si Giovanni Padillo maoy miselyo sa kadaugan pinaagi sab sa iyang usa ka free throw sa nahabiling 10 segundos.

 Si Padillo mi-iskor og 15 puntos aron pangulohan ang Warriors, samtang sila si Cincoflores ug John Paul Abad nga parehong mihipos og 10 puntos mao sab ang nangulo sa pilderong Lancers, kinsa adunay 2-1 nga baraha.

Sa pasiunang duwa, ang Ave Maria-USJR Jaguars mitumba sa Prime Asia-DBTC Greywolves sa iskor nga 76-62.

Ang way pildeng Jaguars (2-0)   gipangulohan ni Marvin Duran, kinsa milawog og 17 puntos.

Si Allain delos Santos maoy nangu sa Greywolves pinaagi sa iyang 13 puntos, samtang sila si Jefford Aldave ug Joseph Villaver midugang og 11 ug 10 puntos matag usa.

PUNTOS MATAG USA

Unang duwa:

Ave Maria-USJR (76) - Duran 17, Gabas 7, Villaver 7, Abing 7, Amores 6, Delfino 6, Senining 5, Bibera 4, Suliman 4, Olvedado 4, Dela Pena 3, Albarillo 3, Lapiz 3

Prime Asia-DBTC (62) - Delos Santos 3, Aldave 11, Villaver 10, Singco 6, Hernando 6, Juntilla 4, Terrado 3, Labagala 3, Lumapas 2, Tecson 2, Dela Rama 1

Ikaduhang duwa:

San Marino-USC (78) - Padillo 15, Hermosa 11, Bercede 9, Bautista 9, Otida 7, Bakker 6, Belangel 6, Cortes 5, Panerio 4, Duran 3, Cantonao 2, Santos 2, Uy 2

PTT-UV (74) - Cincoflores 10, Abad 10, Calo 8, Olivares 8, Mercader 7, Silva 6, Seneres 6, Lao 5, Perolino 3, Saycon 3, Manigque 3, M. Cabahug 2, Premacio 2, Avillanoza 1   (BANATNEWS)