Losiaboi, De los Santos naghari sa Kasadya Run

CEBU, Philippines - Human sa ilang kapakyasan sa miaging Cebu City Marathon, nanghawod na sab sila si Mary Grace de los Santos ug Simon Losiaboi sa gipahigayong Kasadya Run 2010 niadtong miaging adlaw diha sa Osmeña Blvd., ning siyudad.

Si De los Santos mipamatuod nga siya gihapon ang rayna dinhi sa Sugbu dihang iyang gisakmit ang titulo sa 10K women’s division. Gitapos ni De los Santos ang dagan sulod sa 38 minutos ug 32 segundos.

Ang produkto sa Southwestern University (SWU) nga si Mary Joy Tabal, maoy mipahiluna sa ikaduhang dapit sa oras nga 40 minutos ug siyete segundos, samtang si Joeyry Lee mao ang mikapyot sa ikatulong dapit sa oras nga 42:40.00.

Sa iyang bahin, ang 27-anyos nga si Losiaboi maoy giilang hari sa karsada human niya gitapos ang dagan sulod sa 31 minutos ug 20 segundos.

Ang taga-Davao nga si Elmer Bartolo maoy mi-okupar sa ikaduhang dapit sa oras nga 32:28, samtang si Ian Bernido napunta ngadto sa ikatulo sa oras nga 32:44.

Sa 10K executive division, sila si Brandon Bon ug Melinda Ponce maoy nidominar sa tagsa-tagsa nila ka dibisyon.

Si Bon maoy labing paspas sa men’s class sa oras nga 39:47, gisundan nila ni Arnold Duarez (42:16) ug Manolito Yu (44:30) alang sa ikaduha ug ikatulo nga dapit. Sa women’s division, si Ponce maoy nag-una sa oras nga 52:38 uban nila ni Marivic Yu ( 57:19) ug Humility Egaña (1:02:13) nga mipahiluna sa ikaduha ug ikatulong dapit. 

Gisakmit sab ni Robert Da-ang ang titulo sa 5K MEPZ men’s division human niya gitapos ang lumba sa oras nga 16:20. Si Rogelion Estora (17:57) mitungtong sa ikaduhang dapit, samtang si Mario Olrik (18:04) mitapos sa ikatulo.  

Ang pambato sa Lexmark nga si Emily Rosas (23:07), Mary Imee Aranatado (27:50) ug Tarra Tecarro (28:57) mao ang top three finisher sa 5K MEPZ women’s division.

Sa 3K category, sila si Prince Joey Lee ug Jean Andrin maoy kampiyon sa tagsa-tagsa nila ka dibisyon.

Si Lee mi-oras og 10:45 aron maghari sa boys division, samtang si Andrin (10:45) mao sab ang hawod sa girls class. – BANAT NEWS