Apartelle nag-una gihapon sa BNB

CEBU, Philippines - Padayong gihuptan sa Apartelle Suites ang solong liderato human sila mokulit ug 66-60 nga kadaogan batok sa Eigado Real Estate sa miaging adlaw atol sa nagpadayong 1st Benjamin Neri Borromeo (BNB) Memorial basketball tournament didto sa IBC gym sa Banawa, ning dakbayan.

Ang maong kadaogan naghatag sa Apartelle og 6-1 nga baraha ug nag-anam nag palayo tali sa second placer nga San Remigio Beach Club kinsa naghupot lang og 3-1 nga baraha sa kasamtangan.

Usa ka krusyal nga triple ang gibuhian ni Jori Perez nga maoy naghatag og labaw pagbalik sa Apartelle ug maoy nakapausab sa dagan sa duwa samtang ang laing three-pointer gikan ni Wilson Gabucan maoy nagselyado sa kadaogan. Si Gabucan maoy nangu sa Apartelle sa iyang 20 puntos.

Nakapasulod si Gabucan sa iyang triple sa katapusang 58 segundos ug wala na makahuygo ang Eigado gikan niadtong tungora ug midailos na sila ngadto sa 3-3 nga baraha.

Sa kasamtangan, bugtong ang Tuesday Club na lang ang wala pa makatilaw og daog sulod sa unom ka duwa.

Ang kanhi shooting guard sa Salazar Institute of Technology (SIT) Skyblazers nga si Oliver Sanoy midugang og 14 puntos alang sa Apartelle samtang ang ex-USC Warrior nga si Bong Eleazar miabuno og 11 puntos.

Si Martin Grogaard maoy nangu sa opensa sa Eigado pinaagi sa iyang 19 puntos.

Puntos matag usa:

Apartelle (66)— Gabucan 20, Sanoy 14, Eleazar 11, Perez 9, Bodo 6, Gabuya 4, Llegunas 2

Eigado (60)— Grogaard 19, Villagonzalo 18, Santiago 7, Loberanes 6, F. Castaneda 4, Alvarez 3, Castaneda 3. - Gabby G. Malagar (BANAT NEWS)