Cabahug daog 2 ka titulo sa Honda Underbone

CEBU, Philippines - Duha ka titulo ang nasakmit ni Raul Cabahug Jr. sa 1st leg sa Honda Motorworld Underbone Circuit Racing niadtong Domingo diha sa Kartzone sa Panagdait, Brgy. Mabolo, ning siyudad.

Ang pambato sa Cyrus Racing nga si Cabahug mipukan sa mga riders gikan sa MWR-Skut Garage nga sila si Mark Capoy ug Jeslouie Vega aron masakmit ang korona sa 100-110 super stock beginners category.

Gipilde usab ni Cabahug ang iyang higpit nga karibal sa 125 super stock beginners class nga sila Moises Muñoz sa Team Mac ug Capoy aron hipuson ang ikaduha niyang titulo.

Gawas ni Cabahug, laing elite rider nga mipakita og katakus mao si Mario Borbon sa X-Racing team human niya gidominar ang duha ka dibisyon sa Novice Open.

Mihimo og dakung surprisa si Borbon dihang napuhalan niya ang “Rider of the Year” sa PTT-PSR Underbone Series nga si Garry Caneda sa 100-110 Novice Open ug 125 Novice Open categories.

Ang top rider sa Team MAC/Honda Motorworld nga si Lyndon Requilme maoy miangkon sa ikatulo nga dapit sa 100-110 Novice Open, samtang si Christopher Ray Manlise sa Bradz Racing mao ang third placer sa 125 Novice Open.

Ang lumba nga usa sa mga kalihukan sa Sinulog Festival namugna sa hiniusang puwersa sa Honda Motorworld Philippines ubos sa liderato ni Jose Daniel Borromeo ug Jong Uy sa Racing Line TV.    (BANATNEWS)