PABC boxers nidominar sa Summit boxing series

CEBU, Philippines - Nanghawod ang mga boksidor sa Philippine-Australian Boxing Club (PABC) sa katapusang hut-ong sa Summit Natural Drinking Water Amateur Boxing Series diha sa Gaisano Countrymall carpark sa Brgy Banilad, ning siyudad.

Ang pagkapukan ni Bebe Rama batok ni Jomar Caspe sa Cabancalan mao ang naghatag og nakapainit sa mga boksidor sa PABC.

Agi'g panimalos sa gidangatan sa iyang maguwang, si Richard Rama way kukaluoy nga mikulata ni Vicente Seo-se Jr. sa Cabancalan sa ilang away ubos sa 25 kgs. class.

Gisundan ni Rason Tarona, kinsa mipahunong ni Rommel Tuñacao sa Flores Boxing Club sa 28 kgs., samtang si Jeffrey Estella mimakmak ni Reymund Ramsa sa 32 kgs. class.

Laing boksidor nga mihatag og daog alang sa PABC mao si Jason Tuñacao human ma-disqualify tungod sa low-blow ang kontra niining si Uelmark Dignos.

Ang Cabancalan mihakot sab og daog kortesiya nilang Reoxyl Tabogon ug Michael Romarate. Si Tabogon mikulata ni Jun-Jun Britaña sa ilang sangka sa 46 kgs. class, samtang si Romarate midaog sa puntos batok ni Joedel Talle sa 50 kgs. division.

Mokompleto sa mga mananaog mao sila si John Mark Yabut sa Aklan sa 49 kgs., Zaldy Aroa sa Bantayan sa 54 kgs., Joseph Ebalang sa Cagayan De Oro City sa 54 kgs. Mark Bernaldez sa Butuan, Robert Etorma sa Sibonga sa 60 kgs. division.   (BANATNEWS)