Suns misawop sa Phoenix

CEBU, Philippines - Mikulit sa labing dako nilang puntos nga daog karon nga season ang Memphis Grizzlies dihang ilang gilubong ang host Phoenix Suns sa iskor, 128-103 kagahapon atol sa nagpadayong duwa sa National Basketball Association (NBA) sa US Airways Center sa Phoenix, Arizona.

Laing mihimo’g dakong upset kagahapon mao ang host Chicago Bulls kinsa mibaraw sa Orlando Magic, 101-93 pinaagi sa maayong depensa batok kanilang Dwight Howard, Vince Carter ug Rashard Lewis.

Mikamada ug 25 puntos si O.J. Mayo aaron pangulohan ang Grizzlies samtang si Sam Young mikulit ug career-high 22 puntos aron pab-abag sa Grizzlies kinsa naghupot na karon ug 16-16 nga baraha ug nakakab-ot na sa .500 winning mark nga nagpasabot nga mas maayo sila ug agi karon nga season kung itandi sa miaging tuig.

Sa miaging tuig, mikulit ang Grizzlies sa ilang ika-16 nga daog didto na sa Marso 4 sa ilang ika-60 nga duwa. Karon, aduna pa la’y 32 ka duwa ang Grizzlies ug nakakuha na sila’g 16 ka daog.

Pulos sab mi-iskor ug double figures sila si Marc Gasol kinsa may 19 puntos, Zach Randolph sa iyang 18 puntos, Rudy Gay 16 puntos ug ang rookie nga si Hasheem Thabeet 10 puntos.

Si amare Stoudemire maoy nangu sa 21-13 nga suns pinaagi sa iyang 29 puntos, si Steve Nash miamot ug 19 puntos ug may 13 ka assists ug sila si Lou amundson ug Goran Dragic may 14 ug 13 puntos, matag usa kanila alang sa namugnaw nga Suns.

Sa laing bahin, si Derrick rose mi-iskor ug 30 puntos aron pangulohan ang Bulls. Si Rose adunay career-high 32 puntos nga iyang nahimo didto sa Atlanta sa miaging buwan. Sila si John Salmosu ug Luol Deng maoy mitimbang kang Rose human sila mo-iskor ug 15 ug 14 puntos matag usa.

Si Matt Barnes maoy nangu sa Magic kinsa pabilin karong nahimutang sa ikatulong pwesto sa Eastern Conferecne sa ilang 24-9 nga baraha.

Napugngan sa Bulls sila si Howard, Carter ug Lewis diin wala maka-abot ug double figures ang ilang iskor nga eskalera— nuybe puntos kang Howard, otso puntos kang Carter ug siete puntos kang Lewis.

Mao kadto’y ika-upat nga sagunson nga daog sa Bulls nga aduna nay 14-17 nga baraha. Ang Bulls wala na gyud modaog ug lima ka sagunson nga duwa sukad sa Abril 4-13, 2009.

Sa laing resulta palibot sa NBA, gipakuratan sa Charlotte ang Miami, 107-97, naka-ipsot ang New Orleans batok Houston, 99-95, gipukan sa Denver ang Utah, 105-95, midaog ang Dallas batok Sacramento, 99-91, midaog ang Cleveland batok sa New Jresy, 94-86, midaog ang San Antonio batok Washignton, 97-86, midaog ang Indiana batok Minnesota, 122-111, midaog ang Boston batok sa Toronto, 103-96 ug gilubong sa Portland ang Golden State, 105-89. - GGM via NBA.com (BANAT NEWS)