YEAR of the TIGER

CEBU, Philippines - 2010 na sab kita mga fanatics sa Banat News. Hinaut padayon kamong magpabilin nga among suki ug mga loyalista ning atong pamantalaang Binisaya.

Ato sang i-ampo nga ang bag-ong tuig ubos sa Year of the Tiger (metal tiger) magdala o maghatag kanato’g swerte sa tibuok tuig natong panlimbasog hangtod na mosumad sa 2011.

Matod pa nga ang lion maoy “king of the jungle” sumala sa atong mabasahan sa libro. Karon ang Tiger maoy king of the calendar.

Tungod sa kampanya batok sa pagpasagad og pabuto, may maayong balita ang gidala sa 2010 kay matod pa sa taho ilabi na sa mga awtoridad sa mga ospital, mikunhod ang mga biktima sa pabuto.

Apan pwerteng binuanga aning balitaa kay mentras mimenus ang biktima sa pabuto, mas misaka ang nabiktima sa naigo ug mga saag nga bala o kining gitawag nato og “indiscriminate firing” o pagpataka og pabuto sa mga armas—ma-revolver man kini, pistola o armalite ba hinoon.

Ambot og unsa ning kalakiha. Nagduda lang ta niining atong kapolisan kung tinuoray ba kining ilang kampanya o pakitang tao lang aron ingnon adunay gibuhat.

Dili hinuon tanan mga kwanggol kining atong mga awtoridad apan puera lang usab sa maayo, kadaghanan kanila mga labad sa ulo o mga abusado ug may maayo pang mga sibilyan kay makasabot pa unsay balaud. Dinhi imong makita kung unsa gyud pagka wala'y disiplina kining atong mga sakop sa pulis ug militar kay daku ako’g pagtuo nga sila ra maoy naghimo niini ug gani, aduna may taktakunon nga pulis sa Manila kay nagpataka’g pabuto ug nalungag intawon ang bagul-bagul sa biktima nga gitambalan didto sa ospital.

Apan kun imong pangutan-on ang imong kaugalingon o imong tugkaron kinsa may gitugotan pagdala og armas ilabi nga kalibre 38, 45, 357 o mga tag-as nga kalibreng armas di ba sila ra man sab?

Kanang ubang mga security agency nga shotgun man maoy service ana ug kung imong tan-awon ang posing, mas hambugero pa sab sa mga pulis. Atong makita unsa silang klaseha sa pagkatawo ug pagka-way disiplina kay inay mga LAW MAKERS pero LAW BREAKERS man hinoon. Hahay kaninyo.

Kamo ray kamao magpabuto? Magpabuto mi uy sa 2011. Wala lang tay hilabtanay ha kay kamo magsige mo’g pamadlong aron wala mo’y kumpetinsya. Unaha usa’g badlong inyong kaugalingon sards.

* * *

Karong Enero 9, saulogon ang ika-78 nga anibersaryo sa Cacoy Doce Pares World Eskrima Federation diha sa ilang headquarters sa dan C. Padilla. Ang Supreme Grandmaster nga si Ciriaco “Cacoy” Cañete mao gihapo’y gipiling presidente sa ika-22 nga higayon sukad pa sa tuig 1988 dihang mihulip siya sa iyang igsoon nga namatay nga si Eulogio “Yoling” Cañete. Ang tinuig nga piniliay gipahigayon kaniadtong Disyembre 30, 2009.

Gidapit nga mamumulong ug inducting officer si Cebu City Mayor Tomas R. Osmeña.

Gi-awhag ang tanang mga sakop sa Doce Pares sa pagtambong sa induction diin aduna sa’y himoong promotion sa ilang ranggo.

Karong summer, mas dakung kalihokan sa Doce Pares ang gi-andam ni Cacoy diin adunay gatosan ka mga langyaw nga eskrimador ang mobisita dinhi sa Sugbo. Ang maong kalihokan ila pang plantsahon og maayo kay daku-dako kini’g budget.

* * *

Niadtong Pasko ug sa milabay’ng bag-ong tuig, mi-text kanako si Graham Lim, ang nabilanggong secretary-general sa Basketball Association of the Philippines (BAP) kinsa nagpalabay sa Christmas holidays didto sa Bicutan sukad pa kaniadtong Disyembre 7. Nakaila nako si Graham sukad iyang gipulihan ang kanhi secretary-general sa BAP nga si Nicanor F. Jorge nga usa sab nako ka higala. Wala seguro’y mga sports leaders nga dili nato mahimong higala kay sila man maoy atong tinubdan sa mga balita. Gawas lang tingali niadtong mga lider nga badlungon, aw angayan sab nga dili nato hatagan og pagtagad.

Si Lim didto magsaulog og Pasko ug didto sab magpalabay sa 2009 sa prisohan. Alang kaniya mao kadto’y pinakamasulob-ong yugto sa iyang kinabuhi. Nabilanggo na siya kaniadto apan sa iyang pamilya siya namasko kay kadiyot raman kadto.

Kini gud si Lim nag-atubang man og kaso nga deportation tungod kay gipasanginlan siyang naghupot og peke nga passport ug ang iyang mga kaatbang mipasangil sab kaniya nga usa ka illegal alien o “undesirable alien” kay lagi usa kuno siya ka Taiwanese citizen ug dili Filipino citizen busa wala’y igong rason nga manghilabot sa pagpadagan og sports dinhi sa Pilipinas.

Sa makadaghan, gipanghimakak kini ni Lim kinsa maisugong misukol ug mibarog nga usa siya ka Filipino kay dinhi siya mahimugso sa Manila apan iyang giangkon nga Insik ang iyang mga ginikanan.

Isip higala, nalooy ako ni Graham apan mas nalooy ako sa iyang anak lalaki nga si Graham Jr. ug sa 11-anyos nga anak babaye nga si Fides Lim kinsang pagtuon naapektohan sa pagkabilanggo sa ilang amahan. Gani, si Graham Jr. mi-apelar sa publiko nga buhian na ang iyang amahan tungod kay dili man kini usa ka banggiitang kriminal nga padugtaon sa prisohan.

Kining kaso sa pagpatay ilabi nga didto sa Maguindanao mas dakung isyu kay kang Graham ug ang iyang  ug sports dili usa ka heinous crime kung itandi sa gipasangil sa banay’ng Ampatuan.­

Matod pa sa iyang mga anak nga wala makapatay og tawo ang ilang amahan. Mga uk-ok, langaw ug lamok nuon sa Bicutan daghan na siya’g napatay (joke).

Miscellaneous: To all Banat News readers and all my friends and sisters whom I missed to greet personally or through my mobile phone during Christmas 2009 and the newly-turned 2010 four days ago, HAPPY NEW YEAR !!!