Caneda daog sa ROY award

CEBU, Philippines - Gitapos ni Gary Caneda Jr. ang tuig pinaagi sa pagsakmit sa “Rider of the Year” sa 2nd Mayor Jonas Cortes Underbone Rallycross Racing 2009 niadtong miaging adlaw diha sa North Reclamation Area sa Mandaue City.

Human sa pait niyang kasinatian sa OZ Racing, diin na-disqualify siya, mibalik si Caneda sa lumba aron pamatud-an nga usa gihapon siya sa mga ngilngig nga riders dinhi sa Sugbu.

Napuhalan ni Caneda ang higpit niyang kaatbang nga si Erwin Albaracin sa Ervin Racing nga mitapos sa ikaduhang luna sa overall points tally, samtang si Dan David Condeno mitungtong sa ikatulong dapit.

Nidaog usab si Caneda sa novice category, gisundan nila ni Emox Tarona sa Ervin Racing ug John Flores sa NC Racing nga mi-okupar sa ikaduha ug ikatulo nga dapit.

Si Caneda mipahiluna sa ikatulo sa expert division nga gidominar ni Albaracin, samtang si Condeno nahimutang sa ikaduha.

Wala sab magpabitin si Malbert Rama diin iya sab nga giangkon ang titulo sa beginners open category uban nila ni Flores ug Jason Dela Cerna nga nahimutang sa ikaduha ug ikatulo nga dapit.

Sa motocross event, si Jon Eleazar Adlawan mipakita sa iyang kahanas aron langkaton ang korona sa expert division, gisundan nila ni Giovanni Abellar ug John Flores nga miangkon sa ikaduha ug ikatulong dapit. – BANAT NEWS