Mandaue, Talisay hawod sa 5th GUV Cup

CEBU, Philippines - Nanghawod ang Mandaue ug Talisay sa city cluster sa 5th Governor Gwen Garcia Unity Volleyball (GUV) Cup niadtong Domingo diha sa Cebu International Convention Center (CICC) Summit Hall.

Mikulit og kasaysayan ang mga Mandauehanon human sila midaog sa usa ka kulbahinam nga sangka batok sa Talisay, 22-25, 25-20, 31-29, 25-18, aron sakmiton ang titulo sa men’s division.

Ang Talisay ubos sa liderato ni team captain Norvie “Making” Labuga unang miratsada sa first set, 25-22 kortesiya sa mga atake nilang Kevin Casia, Norman Kong, Ronald Moreno, Ryan Mahilum ug Constancio Estella.

Hinuon, mibawos ang Mandaue sa dihang nanginit ang mga produkto sa University of San Carlos (USC) nga sila si Roderick Arenasa ug Edward Carlo Tecson uban ni kanhi University of Southern Philippines Foundation (USPF) spiker Rami Espinosa alang sa ilang kadaugan.

Sa pikas bahin, nasakmit usab sa Talisay ang kampiyonato sa women’s division human nila gipukan ang Mandaue, 25-23, 25-29, 25-22.

Ang Talisay nga gipangulohan ni four-time Nestea beach volley champion Florian Gutierrez uban sa kanhi USJ-R spikers Mechell Matuguina, Michelle Gimarino ug Marissa Lagancia mihimo sa ilang solidong depensa aron pugngan ang mga opensa sa Mandaue.

Sa municipal cluster, migawas nga kampiyon ang Catmon ug Liloan sa women ug men’s division.

Milampos ang Catmon sa pagsakmit sa ilang back-to-back title dihang ilang gilampaso ang Minglanilla, 25-17, 25-9, 25-20 sa women’s title, samtang gidemolis sa Liloan ang Minglanilla, 23-25, 25-13,25-13, 25-20 aron makuha ang titulo sa men’s division. (BANAT NEWS)