1st Mayor Tomas Osmeña Motocross Cup nahikay na

CEBU, Philippines - Nahikay na ang tanan alang sa labing dakung motocross event sa siyudad sa Sugbu -- 1st Mayor Tomas Osmeña Invitational Motocross Cup karong Domingo diha sa South Road Properties (SRP).

Dul-an sa 100 riders gikan sa Visayas, Mindanao ug National Capital Region (NCR) ang gilaumang mosalmot sa lumba.

Gawas sa P200,000 nga ganting salapi nga gigahin alang sa mga mananaog sa nagkadaiyang kategoriya, ang kagamhanan sa dakbayan sa Sugbu mopakatap sab og mga sakop sa police force ug medics ug ingon man barangay official sa nahisgutang lugar alang sa kasiguroan sa mga riders ug sa mga dumuduong," matud pa ni Cebu City Councilor Edu Rama atol sa press conference kagahapon diha sa Teatro Casino sa Waterfront Cebu City Hotel and Casino.

Sa iyang bahin, si Jonas Adlawan, ang   presidente sa Man and Machine/Power Sports Racing (PSR) nagkanayon nga nakalagda na sila uban sa kagamhanan sa dakbayan sa Sugbu pinaagi sa SRP management alang sa paggamit   sa tipik sa luna sa SRP isip binyu sa ilang motocross races sa umaabot.

Matud pa Adlawan nga mga riders gikan sa Ozamiz, Lanao del Norte-Dimaporo, Dipolog, Zamboanga, Ormoc, Team Pacquiao nga gipangulohan ni Buboy Fernandez, Bohol, Dumaguete ug Sel-J Sports ang nipadayag sa ilang partisipasyon sa maong lumba.

Gibana-banang moabot sa 80 ngadto sa 100 ka riders ang gilaumang mosalmot sa maong lumba lakip na niini ang anak ni Adlawan nga si Jon-Jon, kinsa molumba ubos sa experts division.

Mga kategoriya nga tigian mao ang expert, executive, beginners, intermediate, mini ug peewee. (BANAT NEWS)