3-15-3 triathlon mosikad sab karong adlawa

CEBU, Philippines - Mosikad na karong buntag ang katapusang hut-ong sa 3-15-3 Triathlon diin magtigi ang kapin sa 70 ka   triathletes diha sa Plantation Bay Resort and Spa didto sa Mactan.

Mga kategoriya nga tigian mao ang juniors (19-under), seniors (20-29), seniors (30-39), masters (40 above), mountainbike, female open ug tandem.

Ang mga triathletes nga modagan sa 3-15-3 triathlon nga nailhan usab sa ngan nga “Pipti-Pipti” triathlon, motaak sa rota nga adunay gilay-on nga 300m sa swimming, 15km sa biking ug 3km run.

Lakip sa mga tang-ang runners nga mosalmot mao si RP Iron Man champion Nonoy Jopson uban nila ni Gerrie Calinawan, Elmo Clarabal ug Lhoriz Echavez.

Makigginukdanay usab ang mga kanhi sakop sa RP team ug asawa ni Jopson nga si Amale nga makigpares ni Veronica Enriquez.

Lakip sa mopakita'g aksiyon sa tandem category mao si Chris Aldeguer uban nila ni Danao City councilor Ivy Durano-Meca ug Guinsay barangay captain Tya Durano.

Ang maong lumba namugna sa hiniusang puwersa sa Department of Tourism ubos sa liderato ni Secretary Ace Durano, Danao City Mayor Ramon 'Nito' Durano III ug sa iyang igsuon nga si Congressman Red Durano.    (BANATNEWS)