Peñalosa Jr. mikulata ni Estquimbo

CEBU, Philippines - Mipakita sa iyang katakus ang amateur boxing sensation nga si Dodie Boy Peñalosa Jr. sa Cebu City Sports Center (CCSC) stable dihang iyang gikulata si John Ryan Estquimbo sa Cortes Stable sa “2009 Paboksing sa Barangay” diha sa Brgy. Guadalupe Sports Complex, ning syudad.

Ang batan-ong Peñalosa mibuhi sa iyang mga naghaguros nga kombinasyon ngadto ni Estquimbo, kinsa nagpunga-punga sa pagpanagang sa iyang kaugalingon. Bisan og gilumsan og mga kinumo, ang pambato sa Flores Gym nga si Estquimbo mipakita gihapon og kalig-on ug nakahuman gyud sa maong sangka, apan si Peñalosa maoy midaog pinaagi sa puntos, 3-0.

Gawas ni Peñalosa mihatag usab og daog alang sa CCSC stable mao sila Junriel Jimenez, Rodex Piala, Jay-R Barroma, Allan Refuella ug Raymund Empic.

Si Piala midaog pinaagi sa puntos batok ni Rommel Vega sa CBA, samtang si Barroma mimakmak ni Juvanni Ruellan sa Pasil stable, si Empic mipukan ni Jared Jalil Payao sa Omega Stable ug si Refuella midaog batok sa iyang karibal nga si Lyndell Raduc sa Sta. Cruz Stable.

Mikompleto sa mga boksidor nga midaog mao sila Jack Tepora sa Omega Stable, Mike Tyson Labor ug Jomark Cabillon sa Rex Wakee 'Salud' stable (RWS) ug Jonas Sultan sa Seville stable. – BANAT NEWS