Sukmagay sa Country Mall

CEBU, Philippines - Dose ka parisan ang magbinukbukay sa laing hugna sa 2009 Summit Natural Drinking Water Amateur Series karong gabii diha sa Gaisano Country Mall sa Banilad, ning siyudad.

Ang Flores Boxing Club moparada og tulo ka boksidor nga sila si Ariel Sibal sa 26 kgs., Johnrief Jecong sa 31 kgs. ug Ramel Vega sa 36 kgs. division.

Si Sibay moharong ni Ramel Casañares sa Banilad, si Jecong mosukod sa abilidad sa taga-Ibabao nga si Marco Cotching samtang si Vega makigsinukliay og kumo batok ni Jeffrey Pormentera.

Ang Cabancalan National High School bitoonan nila ni Reoxyl Tabogon, kinsa mosuway pagpatumba ni Jun-Jun Britaña sa Sta.Cruz stable sa Talisay ubos sa 49 kgs. ug Michael Romarate batok ni John Mark Yabut sa Kalibo, Aklan.

Si Jomer Caspe makigbinukbukay batok ni Dominique Casañares sa 23 kgs. division. Ang teammate ni Britaña nga si Jovert Alvarez makigsinukliay usab og kumo batok ni Jun-Jun Sultan sa Zamboanga.

Moaway sab si Robert Labanza sa Balamban batok ni Robert Etorma sa Sibonga, si Mark Benaldez sa Butuan batok ni Jocel Estopa sa Consolacion sa 60 kgs. division.

Mokompleto sa baraha karong gabii mao si Jesriel Gumapak sa Tagbilaran batok ni Joedel Talle (50kgs.), Zalde Aroa batok Joseph Ebalang (53 kgs.) ug Jomar Torreon batok Ryan Canillas (58 kgs.). – BANAT NEWS