NAFBA nakatapsing batok sa darusba

CEBU, Philippines - Nakapasulod si Normie Panilag og usa ka krusyal kaayong lay-up atol sa buzzer aron baswaton ang Naga Above Forty Basketball Association (NAFBA) ngadto sa usa ka kulba-hinam kaayong 80-79 nga kadaogan batok sa Danao Ruby Star Basketball Association (DARUSBA) atol sa pagbukas sa bag-ong natukod nga Cebu Golden Basketball League (CGBL) kaniadtong Domingo didto sa Inayawan Sports Complex.

Sa laing duwa, midaog ang host Power Forty batok sa Minglanilla Basketball Associaiton (MIBA) sa iskor, 99-87 samtang sa ikatulo ug kataposang duwa, midaog ang Los Amigos Basketball Association (LABA) batok sa Better Run Basketball Associaiton (BRBA) nga gipangulohan ni Danny Duran sa iskor, 69-65.

Ang three-point play sa presidente ug captain ball sa DARUSBA nga si Joel Castañeda maoy naghatag sa iyang team sa labing unang labaw sa duwa , 79-78 gikan sa foul ni Vic Baltazar sa NAFBA may 15.6 segundos ang nahibiling oras apan gitubag dayon kini ni Panilag kinsa wala himatikdi nga mikalit lang og sutoy alang sa lay-up igo gyung mihuni ang buzzer.

Tungod sa kalipay, miligid sa sawog sa gym si Panilag ug naglukso-lukso ang iyang mga kauban didto sa bench. Ang winning basket maoy ika-dose nga puntos ni Panilag.          

Si Isidro Gentapa ug Celio Repuesto maoy nangu sa NAFBA sa parehong 17 puntos ug si Tony Diaz midugang og 16 puntos.

Castañeda almost matched his output of 32 points to his jersey number 33.

Sa laing duwa, mihakot og 23 puntos si Jingjing Gacayan aron pangulohan ang Power Forty samtang si Ramon Ceballos miabuno og 20 puntos.

Ang MIBA gipangulohan ni Toto Fuentes kinsa mi-iskor og 23 puntos apan wala pa gani magsugod ang duwa daan na silang midaog tungod kay sila maoy nanag-iya sa Miss CGBL human mapili si Terry May Vasquez, ang 19 anyos nga estudyante sa HRM sa University of Cebu.

Sa laing bahin, si Rudy Candelada maoy nangu sa LABA sa iyang 24 puntos ug ang kanhi USC Warrior power forward nga si Dennis Patindol midugang og 18 puntos.           

Ang Better Run gipangulohan ni Alex Albano ug Dodong Lopez kinsa mi-iskor og 18 ug 11 puntos matag usa. - Gabby G. Malagar (BANAT NEWS)