LAGUNA nakaipsot

CEBU, Philippines - Ang three-point shot ni Roser Benjamin Mangahas sa katapusang dos segundos maoy mituboy sa Laguna Trace Stallions batok sa Quezon City Red Oilers, 92-91, sa battle for third place sa Liga Pilipinas Conference 3 “Super Leg” kagabii diha sa Cebu Coliseum. Init ang kumbati sa duha ka koponan gikan sa pagsugod ngadto sa katapusang gutlo sa duwa dihang gipagawas na nila ang tanan nilang kusug aron makuha ang third place sa pagtak-op sa ikatulong season sa labing dakung regional basketball tournament sa nasud.

Unang mipakita sa ilang kabangis ang Red Oilers ni coach Oliver Bunyi, sa pagpangulo ni Luis Palaganas nga mibubo og 11 puntos alang sa uno punto nga labaw sa first period, 27-26, apan dali usab nga nakabawi ang Stallions ni Nomar Isla dihang giilog nila ang labaw sa katapusang segundo sa halftime, 47-48, human sa buzzer-beater ni Leomer Losente.

Ang reserve guard nga si Ryan Panzo, Floyd Dedicatoria ug ang kanhi UV Lancers nga si Robert Labagala mao ang mikarga sa ilang koponan sa second-half ginamit ang ilang fast-break plays nga maoy nihatag sa Quezon sa dos puntos nga labaw, 89-91, sa nahibiling 10.9 segundos sa duwa.

Apan nahugno ang paglaum sa Quezon nga mobiya sa torneyo bitbit ang tropeyo dihang walay pagduha-duhang mibuhi si Mangahas sa iyang game-winning triple nga maoy nihatag sa Laguna sa daog.

Si Losentes maoy top scorer alang sa Laguna sa iyang 23 puntos, gisundan nila ni Ron Capati ug Robert Sanz nga mikabkab og 14 puntos matag usa ug si Mangahas nga miiskor og 11 puntos.

Samtang ang nadisgrasya nga Quezon gipangulohan nila ni Panzo ug Jonathan Piñera kinsa mibugha og 19 puntos matag usa.

Puntos matag usa:

LAGUNA (92) - Losentes 23, Capati 14, Sanz 14, Estrada 13, Mangahas 11, Anquilo 8, Villaver 6, Musni 1, Grijaldo 1

QUEZON (91) - Panzo 19, Piñera 19, Palaganas 12, Raymundo 10, Mondragon 10, Dedicatoria 8, Labagala 6, Orias 6, Cacha 1. - BANAT NEWS