Final leg sa OZ Racing Grand Prix Series 2009

CEBU, Philippines - Makasaksi na sab og laing kulbahinam nga aksiyon ang mga Sugbuanon nga hilig og motorsports sa pagpahigayon sa ikalima ug final leg sa 2009 OZR Grand Prix Series karong Domingo diha sa Parkmall parking area.

Dili momenus 50 ka riders gikan sa 10 ka racing teams ang gilaumang mopakita'g aksiyon sa usa ka adlaw nga kompetisyon.

Kini mao ang Team Mac, Team Pidot, OZ Racing, Cyrus Racing Team, Team Norkis, Bradz Racing Team, Drei Bikes, Skut Garage, X-Racing ug URBC Team.

"Mas nindot ug kulbahinam unya ang maong lumba kay mao kini ang final leg," matud pa ni OZ Racing marketing director Chad Mascariñas atol sa news conference kagahapon diha sa BO's Coffee sa Parkmall.

Uban ni Mascariñas sa paglusad sa kalihukan mao si Joseph Neil Calumpang sa OZ Racing, Andrei Ursal sa Drei Bikes, Arnell Fajardo sa Team OZR, Insik Flores ug Marion Borbon sa Team X-Racing ug Scout Tumulak sa Norkis.

Tuyo sa maong five-leg underbone motorcycle racing mao ang pag-promote sa sports ug pagkaplag og mga bag-ong talento sa mga local riders.

Mga kategoriya nga tigian mao ang beginners superstock 110cc., beginners superstock 125cc., automatic mix open, novice open, expert open ug ang labing bag-o "first timers" division. – BANAT NEWS