San Miguel batok Coca-Cola

CEBU, Philippines - Mosugwak karon ang Cebu Coliseum sa bagang duot sa katawhan, kinsa mosaksi sa duwa tali sa 2009 Fiesta Cup Champion San Miguel Beermen ug Coca-Cola Tigers sa pagpadayon sa elimination round sa PBA Philippine Cup.

Ang duwa sugdan sa alas-5 sa hapon.

 Dili kini ang unang higayon nga mobisita ang duha ka koponan dinhi sa Sugbu, tungod kay pulos na sila nakaduwa diha sa Cebu Coliseum batok sa M. Lhuillier Kwarta-Padala Cebu Niños atol sa ilang exhibition games.

Hinuon, niining higayona, giatngang ipagawas sa duha ka koponan ang tanan nilang katakus aron masakmit ang daog ug mapalambo nila ang ilang standings sa elimination round.

Nagtinguha karon ang Beermen nga mosakmit sa ikatulong sunod-sunod nilang daog aron makuha nila ang ikaduhang puwesto, samtang ang Tigers mosuway karon pagsakmit sa ikaduha nilang daog aron mahayagan pa ang ilang paglaum nga moabante ngadto sa playoffs.

Ibala karon ni Beermen coach Siot Tanquincen sila si Mic Pennissi, Danny Ildefonso, Olsen Racela, Lordy Tugade ug Cebuano hotshot Dondon Hontiveros aron panitan ang samarang Tigers, apan si coach Kenneth Duremdes

sa Tigers andam usab mopugong sa dautang laraw sa Beermen.

Isalig ni Duremdes ang duwa ngadto nilang Dale Singson, Alex Cabagnot, Chris Ross, Ricky Calimag, Mark Macapagal ug higanteng sentro nga si Asi Taulava. – BANAT NEWS