Sambag mipukan sa Tambis-B

CEBU, Philippines - Nahanaw daw aso ang gibuga nga 42 puntos ni Tawi Villarante dihang ang iyang team Tambis-B nasugamak sa Sambag, 104-110 sa seniors division sa 1st Barangay Ibabao-Estancia Council and SK Cup basketball tournament niadtong miaging gabii diha sa Barangay Community Ground sa dakbayan sa Mandaue.

Si Wen-wen Mendoza miburak og 24 puntos, samtang sila si Loquinario ug Vincent Daligdig nagkumboya og 35 puntos alang sa ikaduhang sunod-sunod nga daog sa Sambag.

Sayong mipahungaw sa ilang kainit ang Sambag ug miposte kini'g 22-13 nga bentaha paghuman sa first period, apan si Villarante mipasulod og upat ka three-pointers aron pahakan ang labaw ngadto na lang sa dos puntos, 54-52 sa halftime.

Nakarekober hinuon ang Sambag sa final period ug nainat og balik ang labaw luyo sa mga paningkamot nilang Mendoza ug Daligdig, 100-92 sa nahibiling tres minutos sa duwa ug sukad niadto wala na mahulga pa ang Sambag.

PUNTOS MATAG USA

Sambag (110) - W.Mendoza 24, Loquinario 20, Daligdig 15, Ouano 12, Teves 11, Gallego 10, O.Mendoza 8, Ronquillo 5, Perez 4

Tambis (104) - Villarante 42, Manglapus 20, Dabon 11, Villafuerte 8, Mercader 8, Chavez 6, Mangubat 3, B.Mercader 2    (BANATNEWS)