Pajo mimakmak sa Mangga sa Ibabao-Estancia caging

CEBU, Philippines - Ang three-point ni Manjo Cabahug sa katapusang siyete segundos sa final period maoy nakaluwas sa Pajo batok sa Mangga, 71-67 sa seniors division sa 1st Barangay Ibabao-Estancia Council & SK Cup diha sa Barangay Community Ground, Mandaue City.

Si Judgen Dayanan mibugha og 18 puntos, si Joey Jimenez mi-iskor og 14 puntos, samtang si Cabahug mitira og 13 alang sa Pajo.

Nagsinukliay og mga puntos ang duha ka kampo sa sayong bahin sa duwa nga miresulta sa panagtabla, 18-all paghuman sa first period. Nakaginhawa ang Pajo dihang miposte kini og tres puntos nga labaw sa halftime, 33-30.

Nailog sa Mangga ang momentum human si Alden Montecalvo miposa og tulo ka triples sa nahabiling 1:20 minutos sa fourth period, 63-61.

Nahimong kulbahinam ang duwa dihang nagtabla ang iskor, 67-all kortesiya ni Jimenez sa nahabiling 58 segundos, apan ang Pajo maoy mipatigbabaw paghuman sa duwa.

Si Dayanan maoy topscorer sa Pajo pinaagi sa iyang 18 puntos, gisundan ni Jimenez nga adunay 14 puntos, samtang si M. Cabahug miabuno og 13 puntos.

Ang pilderong Mangga gipangulohan ni Montecalvo, kinsa miani og 16 puntos.

Ang maong liga gipasiugdahan ni Ibabao-Estancia Brgy. Capt. Jun Del Mar, Councilor Jonathan Dela Peña, SK Chairman Cha-Cha Cabahug uban sa abag nila ni Councilor Jun- Jun Yuson, Jun Ygas ug Pablo Gallego.

Gipaluyohan sab kini sa kagamhanan sa dakbayan sa Mandaue ubos sa liderato ni Mayor Jonas Cortes.

Puntos Matag Usa

Pajo (71) - Dayanan 18, Jimenez 14, M. Cabahug 13, A. Cortez 9, A.Cabahug 8, Mahusay 7, Cinco 2

Mangga (67) – Montecalvo 16, Carvana 14, Otadoy 13, Argallon 11, A.Blanquero 5, J.Blanquero 4, Divinagracia 4.  – BANAT NEWS