Sugdan na ang kumbati

CEBU, Philippines - Ipakita na ni hardcourt sensation Kiefer Ravena gikan sa UAAP juniors champion Ateneo Blue Eaglets iyang katakus ngadto sa mga Sugbuanon dihang siya ang mangulo sa RP Youth Under-16 squad sa ilang unang duwa batok sa Japan sa pagsugod sa 2nd Nokia Youth Invitational Basketball Championship karong adlawa diha sa University of San Carlos (USC)-main gym.

Adunay preliminary game tali sa Hapee-Online nga langkuban sa CIT Wildkittens batok sa University of San Jose-Recoletos (USJR) Baby Jaguars nga gikatakda sa alas-2 sa hapon.

Ang CIT Wildkittens maoy nidaog sa CESAFI juniors crown human ilang gipukan ang USJ-R Baby Jaguars.

Human sa opening game tali sa Chinese-Taipei batok Iran, adunay opening ceremonies nga pagahimuon aron pormal nga ipaila sa publiko ang mga partisipanteng koponan.

Si Ravena maoy usa sa labing hait nga hinagiban alang sa Blue Eaglets dihang ilang giharos ang higpit nga karibal   De La Salle-Zobel nga gipangulohan ni Gwen Capacio.

Si Ravena anak ni kanhi PBA star Ferdinand 'Bong' Ravena, samtang si Capacio anak sab sa laing kanhi pro nga si Glenn Capacio, kinsa mao karon ang head coach sa Far Eastern University (FEU) Tamaraws.

Ang upat ka adlaw nga torneyo kabahin sa pagpangandam sa RP Team sa ilang pagsalmot sa FIBA-Asia juniors basketball competition didto sa Malaysia karong Nobiyembre 19-29.

Ang maong torneyo gipaluyohan sa Nokia Philippines uban sa abag sa Rotary Club of Cebu-Fuente nga gipangulohan sa ilang presidente nga si Rady Abarintos.

Ang Japan ug Chinese-Taipei niabot kagabii uban sa RP Youth.

Gawas ni Ravena, ang RP Youth Team ni coach Eric Altamirano gilangkuban nilang Cederick Labing-isa, Dan Sara, Angelo Alolino, Chris Tolomia, Von Pessumal, Kevin Ferrer, Jeron Teng, Michael Pate, Raf Nayve, Rene Sta. Maria, Emmanuel Bonleon, Gabriel Reyes, Jeoff Villomar, Paolo Romero, Prince Caparal ug Nestor Bantayan. – BANAT NEWS