Clarabal nanghawod

CEBU, Philippines - Nanghawod na sab si Elmo Clarabal sa 3-15-3 Triathlon niadtong miaging adlaw didto sa San Beach Resorts sa dakbayan sa Danao.

Gipahimuslan ni Clarabal ang hunas aron mopatik og bag-ong rekord sa oras nga 37:16 ug ingon man papason ang karaang rekord ni Gerry Calinawan nga 37:54 niadtong Marso 29.

Nahimong higpit nga kaatbang ni Clarabal ang koponan sa Fatboy Slim nga gilangkuban nila ni Lloyd Debalucos ug Frederick Pahanonot ug Team PLDT nila ni Clark Arche ug Ruel Binolirao atol sa 3K swim, 15K bike ug 3K run.

Si Ralph Martin Sios-e mipahiluna sa ikaduhang luna sa oras nga 40:23, samtang si Jenerrey Simbajon maoy mipuwesto sa ikatulong luna sa oras nga 41:10. Ang Fatboy Slim maoy nakampiyon sa tandem category, gisundan sa Team PLDT sa ikaduhang dapit ug Team PII sa ikatulong luna.

Ang labing batan-ong triathlete nga si Vince Mahinay maoy nangharos sa juniors (19 below) category sa oras nga 51:16, samtang si Kristian Cabahug mao ang labing paspas sa seniors 20 sa oras nga 42:03, gisundan ni James Noval sa oras nga 43:50 sa ikaduhang luna ug Meljon Tezon sa ikatulong dapit sa oras nga 46:42.

Sa seniors 30, si Edmar Osing maoy miguwang kampiyon sa oras nga 42:59, gisundan ni Jhun Omero sa oras nga 43:17 ug ni Eugene Sanchez sa oras nga 45:59.

Si Osing mao sab ang naghari sa mountainbike category dihang iyang gipukan silang Jezreeh Ramoneda ug Warren Ceballos. Si Cesar Telan maoy giilang kampiyon sa masters division sa oras nga 48:55, gisundan nila ni Dioscoro Remata sa oras nga 52:07 ug Antonio Veloria sa oras nga 52:28.

Ang maong lumba gipasiugdahan ni Danao City Councilor Boying Rodriguez, Danao Sports Commission ug Sugbu Triathlon. – BANAT NEWS