Milo National Finals sugdan na

CEBU, Philippines - Mobanat na ang kapin sa usa ka libo ka atleta gikan sa upat ka koponan lukop nasud alang sa unang adlaw sa 1st National Milo Little Olympics National Championships 2009 diha sa Cebu City Sports Center.

Gikan sa 20,000 ka atleta nga gihashasan sa regional elimination nga gipahigayon didto sa National Capital Region (NCR), Luzon, Visayas ug Mindanao, niabot nalang karon og 1,073 ka mga atleta nga magtigi sa elementary ug secondary divisions.

Ang host nga Team Bisdaks nga maoy mirepresentar sa Visayas region, maninguha karon nga mosakmit og bulawang medalya sa track and field event nga sugdan karong alas-6 sa buntag diha sa CCSC oval.

Gawas sa athletics nga adunay 187 ka mga atleta, tigian usab sa 178 ka mga atleta ang volleyball event, samtang adunay 123 ka mga partisipante ang swimming. Lakip sa mga duwa nga tigian sa mga atleta mao ang taekwondo nga adunay 93 ka partisipante, chess ug gymnastics (70), bandminton (67), football (92), tennis (57), scrabble (39), sipak takraw (32) ug table tennis (63).

Ang badminton, table tennis, scrabble ug lawn tennis nga pulos team competitions ug mosunod sa single round robin format duwaon karong alas-8 sa buntag hangtod sa alas-2 sa hapon diha sa Baseline Recreational Center.

Ang gymnastics didto ipahigayon sa University of San Carlos (USC), sipa takraw adto sa YMCA, samtang ang volleyball duwaon didto sa University of Southern Philippines Foundation (USPF).

Ang tanang duwa gawas   sa scrabble ug sepak-takraw moluntad og duha ka adlaw. I-deklarar ang over-all champion sa pagtapos sa tournament nga magbasi sa point system ug dili na padaghanay og medalya. – BANAT NEWS