CCSC boxers nangulata sa mga kontra

CEBU, Philippines - Subling naghawod ang mga boksidor gikan sa Cebu City Sports Center (CCSC) stable dihang ilang gipangkulata ang tagsa-tagsa nila ka mga kaatbang sa laing hugna sa Cebu City Amateur Boxing Developmental Program: “Paboksing sa Barangay” niadtong miaging adlaw diha sa Sitio Lomboy sa Brgy. Guadalupe, ning siyudad.

Unom sa pito nila ka boksidor ang nidaog batok sa mga boksidor gikan sa nagkadaiyang stables dinhi sa Sugbu.

Si Eran Boyose mao ang unang mikulit og daog alang sa CCSC dihang iyang gilupig sa puntos si Dhomlee Flores sa 25 kgs. class.

Duha usab ka CCSC boys ubos sa 40 kgs. division nga sila si Ardie Boyose ug Alil Ala ang mipahunong sa ilang kontra.

Si Boyose midaog human mi-surrender ang iyang kontra nga si Bob Anthony Bacus sa Sta. Cruz Stable, samtang si Ala midaog pinaagi sa referee stop the fight (RSF) sulod sa 56 segundos sa round 2 batok ni Marvin Alfante.

Laing tulo ka boksidor nga mitunol og daog ngadto sa CCSC mao sila si Jay-R Barroma sa 45 kgs., Ramjess Colinas ug Allan Refuella sa 51 kgs. division.

Bugtong CCSC boxer nga napilde mao si Max Dumon, kinsa wala makapadayon og away human ma-injury sa nahabiling 1:15 sa round 3 batok ni Jicky Alvarez sa Sta. Cruz Stable.

Lakip sa mga midaog sa maong boxing card mao si Jay Molejon sa Bogo nga mipukan ni Joseph Demos sa Sta.Cruz Stable, Ian Refuella sa Pit-os batok ni Kenan Villaflor sa CBA Stable ug Lildyl Radoc sa Sta. Cruz Stable batok ni Junar Alboro.

Ang maong torneyo gipasiugdahan sa Cebu City Sports Commission uban sa suporta sa Cebu City Government sa pagpangulo ni Mayor Tomas Osmeña. – BANAT NEWS