Clear positional extension

Si Ashok Kumar, respetadong sports person ug tagsulat sa librong Snooker and Billiards, miingon nga ang usa ka bilyarista kinahanglang makabaton kanunay og clear positional extension. Ang buot niyang ipasabot sa maong termino mao ang klaro nga mapadayonong pagdominar ug pagkontrolar sa billiard table.

Si Kumar mismo nasayod nga usahay imposible nga mahitabo kini diha sa pagdula kay may higayon man gyud nga maapiki ang preparasyon sa usa ka magdudula ug dili siya makakita og opening alang sa pagpadayon unta sa iyang pagtira. Pero gipasabot ni Kumar nga sa tanang posibilidad, kini unta ang angay buhaton sa magdudula.

Sa pagdula gud og bilyar, kinahanglan nga may desinyo ang magdudula kun unsaon niya paglampos. Ang buot ipasabot sa desinyo mao nga giplano na sa bilyarista ang tanan nga angay niyang himuon atol sa pagdula. Importante lagi nga advanced kanunay ang pagpangandam sa magdudula alang sa iyang game plan.

Si Kumar miingon: "He (ang magdudula) must always took at least two shots ahead. That is the only way of fashioning a substantial break. Forward planning, therefore, really comes down to selecting the shot that best furthers your aim of monopolizing the table and therefore the scoreboard."

Sa tinamban nga sinultihan, kinahanglan nga ang magdudula anaa kanunay sa husto nga position sa pagdaog, pagdominar sa dula ug pagkontrolar sa lamesa. Kinahanglang mahuptan kini niya hangtod sa katapusang bahin sa dula kun gusto siyang maoy mogawas nga mananaog. Kun mapakyas siya paghimo niini, anugon kaayo ang maayo unta kaayo niyang performance sa pagsugod pa lang sa dula.

Angay timan-a sa magdudula nga sa kinabuhi ug sa bisan unsang matang sa pakigbisog anaa ang mga baligho. Dili mapaneguro ang pagdaog gawas lang kun matapos na ang dula. Tungod niini,kinahanglan gyud ang clear positional extension. Kana bang pagkahuman sa usa ka tayada, makita na dayon sa magdudula ang opening sa mosunod nga labing menos, duha ka sunod nga tira.

Mao kini gihimo sa daghang malampusong bilyarista ug nasuta nila nga epektibo kini. Buhata usab kini, Bords!

* * *

(Mga sugyot ug pakisayod? Text sa 0910-810522)   (BANATNEWS)