20 ka mga tunghaan moapil sa 1st BTC Cup

CEBU, Philippines - Labing menos 20 ka mga pribadong tunghaan sa elementarya ug sekondarya ang mipadayag sa ilang pagsalmot sa 1st BTC Cup-Thirsty Hoop Jams 2009, usa ka 3-on-3 basketball series nga ipahigayon sa sunod bulan.

Dose niini mipadala sa ilang   coaches ug sports coordinator alang sa briefing ug konsultasyon nga gipahigayon sa mga organizers niadtong Biyernes didto sa Dimsum Break sa Banilad Town Centre.

“Daku kaayo ang among kalipay nga gihangop sa mga tulonghaan ang among imbitasyon nila nga moapil sa atong torneyo,” nagkanayon si Cerwin T. Eviota, ang commissioner sa 1st BTC Cup atol sa SCOOP Forum didto gihapon sa Dimsum Break BTC niadtong Huwebes.

Inabagan sa Nike Athletic Club ug Dimsum Break,   ang torneyo sugdan karong Agosto 8 ug gikatakda kining mahuman sa Agosto 30.

Ang torneyo gibahin sa upat ka kategoriya: ang 10-under, 12-under, 14-under ug 16-under.

Matud pa ni technical director Edwin Dejacto, nga ang tanang mga players dili molapas sa age ceiling sa matag kategoriya inig ka Septiyembre 1, 2009.

Atol sa briefing, gipasabot sa commissioner ang mga pamaagi ug proseso sa torneyo, samtang gipasabot sab ang mga lagda sa officiating ni Alejandro Monilar sa Cebu Basketball Referees Association (CEBRA).

Mga tunghaan nga nipadala   sa ilang representante atol sa briefing mao ang Benthel Asia School, Cebu Cherish School, Cebu Eastern College, Center for International Education, Don Bosco Technology Center, M. Zed Christian School, PAREF Springdale School, Sacred Heart School of the Society of Jesus, St. Alphonsus Catholic School, St. Louis School, University of San Carlos (USC)-North ug USC- South.

Lain pang walo ka mga tunghaan ang mipahibalo sa mga organizers sa ilang interes nga mosalmot sa torneyo.

Kini mao ang Bright Academy, Child Learning Foundation, Colegio de la Inmaculada Concepcion, Little Angels Montessori School, Royal Oaks International School, St. Francis of Assisi School, University of the Philippines-Visayas Cebu Campus ug ang University of Southern Philippines.

Dugang nga mga detalye ug mga kalamboan mabasa pinaagi sa internet sa http://btc2009cup.wordpress.com.

Niadtong interesado o buot magpakisayod sa maong kalihukan, mahimong mopadala pinaagi sa email sa [email protected]. - PR (BANAT NEWS)