"Lifetime Ban" gipakanaog nga silot

CEBU, Philippines - Gikauyonan sa Board of Trustees sa Cebu Schools Athletic Foundation Inc. (CESAFI) ang desisyon ni commissioner Felix 'Boy' O. Tiukinhoy Jr. nga pahamtangan og lifetime ban ang mga coaches, kinsa ni-walkout sa semifinal games sa CESAFI volleyball tournament.

Sa pakighinabi sa The Freeman, ang igsuong mantalaan sa Banat News, si Tiukinhoy mipadayag sa iyang simpatiya sa mga coaches, apan wala siya'y mahimo tungod kay gisunod lang niya ang nalatid sa rules and regulation sa CESAFI.

Ang maong silot maoy naabot sa board uban sa ilang mga miyembro human nila madungog ang habig sa mga volleyball coaches, tournament manager Ryan Aznar ug ni deputy for volleyball Dr. Danilo Villadolid niadtong miaging gabii diha sa Chikaan Restaurant sa Lahug, ning siyudad.

Gihingusgan sa Board nga ang gihimong pag-walkout sa mga coaches maoy labing taas nga matang sa "unsportsmanlike" conduct nga dili mahimong baliwalaon. Gitambagan usab sa Board ang mga coaches nga basahon una ang rule book sa CESAFI aron hapsay ang dagan sa duwa.

Nagtuo usab si Tiukinhoy nga adunay nagsulsol sa mga coaches sa wala pa nila buhata ang pag-walkout. Nagduda si Tiukinhoy nga adunay gipahigayon nga underground meeting sa wala pa nahitabo ang maong insidente.

Sa iyang bahin, si   Villadolid nagkanayon nga ang hukom sa Board gibasi ngadto sa rules and guidelines sa CESAFI. – BANAT NEWS