Landmasters mo-host karon sa Liga Pilipinas

CEBU, Philippines - Ang Cebu Landmaster-Mandaue manalipod sa ilang balwarte batok sa mga bisitang koponan -- Forward Taguig, Quezon Red Oilers ug Zamboanga Uno Latinos sa ilang pag-host sa Smart Liga Pilipinas Conference III elimination phase karong adlawa diha sa Mandaue City Cultural and Sports Complex.

Ang Landmasters moharong sa Red Oilers sa alas-6 sa gabii human sa engkuwentro tali sa Taguig batok sa Latinos nga gikatakda sa alas-4 sa hapon.

 Human nila gisakmit ang Third Place sa Misamis Oriental leg niadtong Septiyembre 12, maningkamot karon ang Landmasters nga molampos aron mapalambo ang ilang standings sa dili pa matapos ang elimination round.

 Ang Mandaue Landmaster ni businessman Joe Soberano nga nakatigom og otso sa Liga Pilipinas Tour Points.

Sa laing bahin, ang Red Oilers ni Gov. Raffy Nantes ug coach Oliber Bunyi nakatigom na karon og 23 puntos ug kasamtangang nakigtabla sa ikaupat ug ikalimang dapit uban sa Trace-Laguna Stallions.

Aron mahayagan ang ilang kahigayonan nga moabante sa sunod round, ang Landmasters mikuha og bag-ong guwardiya nga si Boyet Bautista ug forward nga si JR Aquino aron mosuporta nila ni Jercules Tangkay, Jerome Cenita, Jeff Latonio ug John Paul Alcaraz.

Mokompleto sa ilang line-up mao sila si Alex Cainglet, Ronald Bucao, Enrico Llanto, Rino Berame, Danny Aying, Mannie Gabas, Francis Mercado ug Joel Solis.

Ang Quezon nga bag-o lang ni-sweep sa Gen. San Leg niadtong Septiyembre 26, magsalig nila ni Angelus Raymundo ug Robert Labagala.   (BANATNEWS)