UC Jrs. naunhan sa Baby Jaguars

CEBU, Philippines - Naunhan sa fourth-seed   University of San Jose-Recoletos (USJ-R) Baby Jaguars ang topseed ug defending champion University of Cebu (UC) Junior Webmasters pinaagi sa pagposte og daog, 85-77 sa Game-1 sa ilang "best-of-three" semifinal series sa 9th Cebu Schools Athletic Foundation Inc. (CESAFI) secondary basketball event kagabii diha sa Cebu Coliseum.

Gawas nga nakauna, ang Baby Jaguars mao sab ang unang koponan nga mibuntog sa Junior Webmasters human nila giharos ang elimination round.

Bisa'g nalubong og 18 puntos sa third period, 35-53, ang Baby Jaguars maisugong nakigbugno hinungdan nga nakan-an ang labaw sa Junior Webmasters, 47-54.

Ang Junior Webmasters mibahar sa fourth quarter, samtang ang Baby Jaguars walay hunong nga mihamag uban ni Clint Muñez nga maoy nangulo sa ilang opensiba.

Nailog sa Baby Jaguars ang labaw, 83-75 sa katapusang 35 segundos nga nakapahayag sa ilang dalan paingon ngadto sa kadaugan.

Si Muñez mibatil og 25 puntos, samtang si Benjie Trozo milawog og 18 puntos alang sa Baby Jaguars. Sila si Arlister Escatron ug Gudeve Edu Autentico mitimbre og 15 puntos matag usa.

Ang naparot nga Junior Webmasters gipangulohan ni Alvin Labolabo pinaagi sa iyang 22 puntos. Wala maka-arte si Jerei Marion Pingoy, kinsa igo lang mi-iskor og kuwatro puntos nga maoy labing ubos niya nga iskor niini nga season. Nakahatag og konsuylo sa UC mao sila si Gerald Ampoon ug Codilla nga nagkumboya og 33 puntos.

Sa laing bahin, si CESAFI commissioner Felix O. Tiukinhoy Jr. mipahibalo kagahapon nga ang Southwestern University (SWU) Cobras pointguard Eliud Poligrates maoy labing ulahi nga entrante sa listahan sa mga suspendidong magduduwa tungod sa pagduwa og laing liga samtang ang wala pa matapos ang CESAFI season nga usa ka kalapasan sa CESAFI.

Gumikan niini, si Poligrates gidid-an sa pagduwa sa ilang tinaktakay nga duwa batok sa University of San Carlos (USC) Warriors alang sa katapusang luna sa collegiate division, nga padayon pang giduwa sa pagsulat niini kagabii.

 PUNTOS MATAG USA

USJ-R (85) - Muñez 25, Trozo 18, Escatron 15, Autentico 15, Go 4, Senining 2, Alob 2, Montecillo 2, Figues 2

UC (77) - Labolabo 22, Ampoon 17, Codilla 16, Nazareno 9, Saramosing 7, Pingoy 4, Talisic 2   (BANATNEWS)