Cebu Blue Marlins nangahas ma-grandslam

CEBU, Philippines - Nangahas ang Cebu Blue Marlins (CBM) nga modaog sa talagsaong grandslam sa pagsikad sa 3rd leg sa G-League Age-group Short Course Swim Meet karong adlawa didto sa Silliman University's Shaw Memorial Swimming pool sa Dumaguete City.

Ang CBM nga agakon sa coach niining si Rolando Alvarez mopalangoy og 35 ka swimmers aron pagseguro nga magpabilin kini sa kinatas-ang dapit.

Mangulo sa CBM mao ang mga sinaligan nga sila si Paula Abigail Vega, Danielle Ballesteros uban sa managsuong Cañeda ug Navarro.

Si Justin Daniel Junio, kinsa gibansagan og 'Wonderboy" human milabang sa Hilotongan channel pipila na ka tuig ang milabaw, nalakip sab sa CBM line-up.

Mao kini ang labing unang aksiyon ni Junio sa maong kompetisyon. Si coach Alvarez mipaapil kaniya sa kompetisyon human miasenso sukad sa paghari niya sa iyang age-bracket sa local novice competition dinhi niadtong summer.

Naangkon sa CBM ang unang duha ka leg titles didto sa Carlos P. Garcia Sports Complex sa Tagbilaran niadtong miaging bulan.

Ang ubang PASA-member clubs nga mopakita'g aksiyon karon mao ang Bohol Dolphins, Negros Blue Dolphins ug ang Red Snappers Swimming Club sa host Silliman University.

Ang maong kompetisyon magsilbeng qualifying action alang sa National finals. – BANAT NEWS