TACABA boxers nanghawud sa "Binukbokay sa Talisay"

CEBU, Philippines - Nanghawud ang mga batan-ong boksidor gikan sa Talisay City Amateur Association (TACABA) human nila gipangpukan ang mga boksidor gikan sa Mandaue City ug Consolacion sa boxing event nga giulohan og “Binukbokay sa Talisay” niadtong Sabado sa gabii didto sa Talisay Sports Complex.

Ang mga garbo sa syudad sa Talisay, midaog og upat sa lima nila ka sangka sa seniors division ug pito sa 10 ka mga away sa 25 ngadto sa 43 kg. weight class.

Sila si Jake Alvarez, Charlie Pukdol, Lendel Radoc ug Jomari Yuson maoy mihatag og daog sa Talisay sa 50 kg. category, samtang sila si Bob Anthony Bacus, Lester Dula, Kit Garces, Joshua Bacus, Marco Pumar, Marvin Pumarug Mark Hera maoy nanghawud sa 25-43 kgs. class alang sa TACABA.

Bugtong boksidor nga nilusot sa seniors division gikan sa Mandaue City mao si Wenceslao Gakit sa Phil-Aust Gym kinsa mipahunong sa second round ni Warren Mayormita sa RTD. Nidaog usab sila si Welmark ug Melmark Dignos alang sa Flores Boxing Club ug Jason Tuñacao sa Phil-Aust Gym.

Sa special bout batok sa duha ka TACABA boxers, mipatigbabaw si CD Noblefranca dihang iyang gilupig sa puntos si Alvin Alfuro.

Ang maong boxing event gipasiugdahan sa kagamhanan sa Talisay City sa pagpangulo ni Mayor Socrates Fernandez uban sa abag sa Talisay Sports Commission ug TACABA. - Lemuel P. Maglinte (BANAT NEWS)