"Friday Nights Live" ilusad karon

CEBU, Philippines - Pormal nga ilusad ni international promoter Sammy 'Don King' Gello-ani sa SGG Sports Promotions ang labing bag-o niyang programa sa boksing nga mao ang "Friday Nights Live" karong adlawa sa SCOOP-Cebu Forum diha sa Baseline Restaurant.

Ang maong "Friday Nights Live" mosikad   ugmang adlawa diha sa Cebu Coliseum diin si WBO Intercontinental super bantamweight champion Ramie Laput maoy mosalida sa main event batok ni Phil Angcamor, segun pa sa taho sa philboxing.com.

Lain pang eksplosibong kumbati nga angayan tan-awon mao ang engkuwentro tali sa beteranong si Nino Suelo sa Manila batok ni Fernando Lumacad sa ABA Gym nga atua magbasi sa Digos City ug ingon man ang engkuwentro tali nilang Filipino-Australian Arnel Barotillo batok ni Joy Pol sa Leyte. 

Sa preliminary bouts, mowadwad sa ilang abilidad sila si Jose Ocampo, Edward Penerio, Ivan Soriano, Anthony Sabalde ug Jerwin Ancajas.

Ang mga tiket, nga mapalit sugod sa alas 3:00 sa hapon sa adlaw na sa away, nagkantidad og P100 sa lower box ug P200 sa ringside. Ang promosyon pagasugdan sa alas 7:00 sa gabii.

Ang maong programa kabahin sa damgo ni Gello-ani nga makahulma og lain pang world boxing champions sa Pilipinas.

Si Gello-ani usa sa mga nag-umol ni 'Marvelous' Marvin Sonsona aron kini mamahimong

WBO super flyweight champion dili pa lamang dugay. – BANAT NEWS