Lopez, Diaz nanghawod sa labing unang IBP Run

CEBU, Philippines -  Wala nagmahay sila si Mendel Lopez ug Maria Estella Mamac-Diaz sa ilang hukom nga modagan sa 5K dihang ilang gidominar ang tagsa-tagsa nila ka dibisyon sa IBP Run niadtong Domingo didto sa Cebu Provincial Capitol compound.

Ang sakop sa Philippine Navy nga si Lopez misakmit sa ikatulo niyang titulo human siya mibalik dinhi sa Sugbu gikan sa training uban sa RP Team didto sa kaulohan.

Nagsunod niya si Ben Alejandro, samtang si John Phillip Dueñas sa University of Southwestern University (SWU) mipahiluna sa ikatulo sa men's open.

Sa iyang bahin, giseguro usab ni Diaz nga mouli sa Davao City bitbit ang kampiyonato human niya gipilde si Miscelle Gilbuena sa SWU ug Lhoriz Echavez nga nalagpot ngadto sa ikaduha ug ikatulong dapit sa women's open.

Si Atty. Haide Acuña maoy reyna sa 5K sa female lawyers class, gisundan nila ni Visminda Truya ug Negley Villanueva.

Sa 5K men’s lawyers class, si Gandhi Truya maoy migawas nga kampiyon, gisundan nila ni Marren Pañares ug James Hupp III.

Ang duha ka banggiitang female runners sa Sugbu nga sila si Madelyn Carter ug Leiszl Lumindas-Getaruelas nisalmot sab sa lumba apan nakahukom nga moapil lang sa fun run.

Sa 3K run, naapsan ni Jorry Ycong si Joel Delposo alang sa men’s open, samtang si Joebert Carolino maoy nitungtong sa ikatulong dapit. Sila si Mary Joy Tabal, Girlie Redolosa ug Donna Bagaria mao usab ang top three finisher sa 3K women’s open.

Sa laing bahin, sila si Lito Ortiz maoy nidaog sa 3K lawyers men’s class, uban nila ni Rameses Villagonzalo ug Esteban Pascua isip runners-up, samtang sila si Virginia Redolosa, Elaine Batan ug Bingo Gonzales maoy top three-finishers sa 3K women’s lawyers class. – BANAT NEWS