CBM nidominar sa G-League Age-Group
CEBU, Philippines - Gidominar sa Cebu Blue Marlins Swimming Club (CBM) ang G-League Short Course Age-Group Swimming Competition nga bag-o lang natapos didto sa Carlos P. Garcia Sports and Cultural Complex sa Tagbilaran City.
Nasakmit sa CBM ang titulo human kini makatigom og 1,116 puntos. Ang Negros Oriental Blue Dolphin nga lawom kaayo'g biya, nahimutang sa ikaduha sa ilang 768 puntos, gisundan sa Silliman University nga adunay 757 puntos.
Ang University of Cebu (UC) tankers mikabkab og 29 golds, 11 silvers ug pito ka bronzes.
Sila si Paula Abegail Vega, Noel Caneda ug Pierre Niño Baguio mihakot og lima ka bulawan matag usa, samtang sila si Joyce Huguete mitunol og duha ka bulawan, usa ka silver ug usa sab ka bronze.
Si Danre Lumapas mikabkab og usa ka bulawan, tulo ka silvers ug usa ka bronze. Si Christopher Paolo Zosa adunay usa ka gold, usa ka silver ug duha ka bronzes, si Michael David Vega adunay usa ka gold ug upat ka silvers. Si Romylyn Nina Ignacio mihakot og tulo ka golds ug usa ka bronze, si Je Rose Rosada adunay duha ka silvers ug si Renan Gabriel Tapang mibugwal og lima ka golds. Si Joebert Indaya mitapos bitbit ang tulo ka bronzes, samtang ang iyang igsuon nga si Karen mikabkab og lima ka bulawan.
Wala sab magpalupig ang managsuong Navarro nga sila si Anthony Navarro II, Lyh Ann ug Anthony Lynn kinsa pulos tinun-an sa Cebu Eastern College. Si Anthony II mikabya og duha ka golds ug tulo ka silvers, si Lyh Ann mihakot og upat ka golds ug usa ka bronze, samtang si Anthony Lynn miharos sa tanang lima ka gold sa 11-under division.
Gikan sa University of San Carlos, si Kyra Tara Ebon mitunol og upat ka silvers, samtang sila si Kirk Tristan Ebon ug Aaron Grant Embuscado adunay tag-usa ka gold ug tag-upat ka silvers.
Si Danielle Mae Ballesteros sa University of Southern Philippines Foundation midugang og upat ka golds ug usa ka bronze alang sa CBM. Si Kristina Angelika Torres sa 3H Childhood Center mihakot og upat ka golds, si Michael Ichiro Kong sa FBC Christian School adunay upat ka golds ug usa ka bronze, si Patricia Mae Baguio sa St. Theresa's College mitiltil og silver ug si Albert Wong sa Southwestern University mitunol og tulo ka bronzes. - Yoyo Abayan uban sa report ni Caecent No-ot (BANAT NEWS)
- Latest
- Trending
