Pag-assess sa performance

Aron pagtino kun niuswag ba ang iyang dinulaan, kinahanglan i-assess sa magdudula ang iyang performance. Dinhi kinahanglang matinud-anon siya sa iyang kaugalingon. Kinahanglang sinsero siya sa pag-ila sa iyang katakus sa dula. Kini aron pagseguro nga wala siya mopabor sa iyang kaugalingon. Dili self-serving.

Si Ashok Kumar, respetadong sportsperson ug may Post Graduate Diploma sa Sports Management, miingon nga sa matag adlaw kinahanglang magpadayon paglambo ang performance sa dula sa usa ka bilyarista. Buot niyang ipasabot nga kun unsa ang performance sa dula sa bilyarista karon, kinahanglang malabwan kini inigkaugma.

Sa higayon gud nga mohunong na pag-uswag ang performance sa usa ka bilyarista, diha ra gyud siya kutob. Dili na kita maka-expect og mas maayo pa gikan kaniya. Ug posibleng ala nay mahitabo sa iyang career. Kun sa tanom pa, mihunong na ang iyang pagtubo. Maong diha ra gyud siya kutob.

Dili ta gustong ingon niini ang mahitabo sa kinabuhi ug career sa usa ka bilyarista. Kinahanglan nga magmakanunayon ang iyang pagka-competitive aron dili siya mabentahaan sa ubang mga magdudula kinsa naningkamot sab sa pagpauswag sa ilang performance sa dula. Sa ingon niini, dili siya sayon pildihon sa   iyang kaatbang.

Pananglit, sa scale nga one to ten, anaa sa number 4 ang imong performance karon, kinahanglan nga malabwan mo ang maong grado sa imong sunod nga pagdula. Kinahanglan nga maka-number 5 ka sa sunod mong dula unya mag-number 6 na sa sunod pa gyud nga pagdula. Unya number 7, 8, 9 ug 10. Sa laktod nga pagkasulti, kanunay nga nagsaka ang level sa performance.

Kun ingon niini ang performance sa usa ka magdudula, dayag nga makita ang paglambo sa iyang abilidad. Seguradong makab-ot gayod niya ang maturity isip usa ka bilyarista. Abunda sa taktika. Dasok sa eksperiyensiya. Daghan og mga paagi unsaon paglusot bisan sa labing lisud nga sitwasyon. Abtik moanalisar sa sitwasyon ibabaw sa billiard table. Kining tanan maangkon sa magdudula kun tinguhaon niya ang pagpalambo sa iyang abilidad sa dula uban ang sinsero nga pag-assess sa performance.

* * *

(Mga sugyot ug pakisayod? Text sa 0910-8105522) – BANAT NEWS