Baby Panthers nakatilaw na gyud og daog

CEBU, Philippines -  Sa katapusan, nakatukob na gyud og daog ang University of Southern Philippines Foundation (USPF) Baby Panthers human gilayog ang Cebu Institute of Technology (CIT) Wildkittens kagahapon sa nagpadayong aksiyon sa 9th Cebu Schools Athletic Foundation Inc. (CESAFI) basketball event diha sa Cebu Coliseum.

Human masukarap batok sa University of San Carlos (USC) Baby Warriors sa overtime, 82-83 niadtong Agosto 11, niining higayona giseguro sa Baby Panthers ang kadaugan pinaagi sa pagpatuman og hugot nga depensa sa nanghinapos nga bahin sa duwa aron dili makaipsot ang abtik nga Wildkittens

Si R-Jie Catipay mipasulod og usa sa duha niya ka free throws aron hatagan og tres puntos nga bentaha ang Baby Panthers sa iskor nga 84-81 sa nahabiling 16.8 segundos sa duwa. Apan naigking ang   Baby Panthers dihang si Franklyn Batiquin miposa sa iyang three-point shot sa katapusang 6.3 sa regulasyon aron pagtabla sa iskor, 84-all nga mihatod sa duwa ngadto sa overtime.

Sa dugang singko minutos, si Rommel Diapera mituhog og 10 sa kinatibuk-an niyang 30 puntos, apan si Joshua Corcilles maoy topscorer sa maong kadaugan pinaagi sa iyang 34 puntos.

Gawas nilang Corcilles ug Diapera, si Christian Baguio ug Catipay mirehistro sab og double figures alang sa Baby Panthers. 

Ang naparot nga Wildkitten gipangulohan ni Batiquin nga miposte og 32 puntos, gisundan nila ni Mark Jayven Tallo ug Joseph Nalos nga mikulit og 18 ug 17 puntos matag usa.

Puntos Matag Usa

USPF (101) - Corcilles 34, Diapera 30, Baguio 13, Catipay 12, Tumulak 4, Gigante 2, Pitogo 2, Silao 2, Arong 2, Rosales 2

CIT (96) - Batiquin 32, Tallo 18, Nalos 17, Limalima 12, Pamaong 5, Bancale 5, Figuracion 3, Tejam 2, Sanchez 2. – BANAT NEWS