Sanai Boxing Club nanghawod sa final leg

CEBU, Philippines - Si Sherwin Caday maoy nangulo sa kadaugan sa Sanai Boxing Club sa final leg sa bulan sa Agosto sa Summit Natural Drinking Water Amateur Boxing Series diha sa Gaisano Country Mall carpark sa Banilad.

Gipaundang ni Caday si Alex Belonguel sa Lapu-Lapu City sa ilang sangka sa 50 kgs., samtang laing tulo niya ka teammates ang milampos sa ilang kampanya.

Si Archie Sarmiento miposte og 2-1 nga kadaugan batok ni Dominique Casanares sa Pit-os sa 23 kgs., si Jerry Baoga nidominar batok ni Ferde San Roque sa Cabancalan sa 43 kgs., samtang si Eford Pesales mipukan ni Richard Quilaton sa Mandaue sa 42 kgs. category.

Ang Cabancalan nga nidominar sa nangaging mga edisyon sa binulan nga series nga gipaluyohan sa Summit Drinking Water sa pakigtambayayong sa ALA Boxing Gym, mitapos bitbit ang 2-2 nga baraha.

Si Vicente Seos-E Jr. maoy mitunol sa unang daog alang sa Cabancalan pinaagi sa pagpukan ni Ramel Canasares sa Pit-os sa 25 kgs. Si Bryan Remidio mimakmak sa iyang teammate nga si Roger Dionson sa 30 kgs. division.

Wala usa magpaulahi ang   Banilad dihang duha sa ilang mga boksidor ang mipatigbabaw.

Si Rene Boy Delema mao ang unang mikulit og daog alang sa Banilad human nidaog   batok ni Ronalden Ignacio, 2-1, samtang si Reycon Lumilis midaog batok ni Angelu Capta sa 33 kgs. division.

Miyagyag sab sa iyang abilidad si Jicky Gako aron hatagan og daog ang Pit-os human gipilde si Jun-Jun Sultan sa Zamboanga, 2-1.

Midaog sab si Robert Labanza batok ni Kevin Jake Catarja, 3-0 sa 42 kgs. class, samtang ang taga-Bogo nga si Jay Molejon pakyas pagkulit og daog human miyukbo ngadto ni Joedel Talle sa 50 kgs. class. – BANAT NEWS