Conde nanghawod sa 12th leg sa MS Motocross

CEBU, Philippines - Milangkat og duha ka titulo si Ted Conde atol sa 12th leg sa 2009 MS Motosuit Motocross Series nga giulohan og "1st Shun J. Shimura Motocross Competition" niadtong Domingo didto sa Poblacion, Daanbantayan.

Si Conde, lumad nga taga-Daanbantayan, nanghawod sa premier expert open ug intermediate division sa maong lumba nga gipasiugdahan sa Castrol Power-1.

Nalupig ni Conde si Jon-jon Adlawan alang sa korona, samtang si Jubenile Abellar mipuwesto sa ikatulong dapit. Sila si Pepo Rubi ug Weng Yapparcon maoy mi-okupar sa ikaupat ug ikalima nga dapit. 

Sa intermediate class, gipalagpot usab ni Conde si Abellar, samtang si Clark Wagas mipahiluna sa ikatulong dapit.

Ang crowd-darling nga si John Flores maoy nidominar sa novice open production, gisundan nila ni Donkey Sanchez ug Aldwin Canlas alang sa ikaduha ug ikatulong dapit.

Wala sab hinuon magmahay si Sanchez kay misakmit kini og duha ka titulo human manghawod sa beginners ug novice open enduro. Si Canlas maoy second placer sa beginners open production, gisundan ni Seigfred Ornopia, samtang si Boni Bustillo maoy first runner-up sa novice open enduro.

Hinuon, si Ornopia ang 2008 Rider of the Year awardee nakabitbit sab og titulo human manghawod sa Executive-A. Ang team captain sa Keiz BJ Racing Team nga si Ornopia, midaog batok nila ni Jun Enriquez ug Tomtom Largosa nga miangkon sa ikaduha ug ikatulo nga dapit.

Mipakita usab sa iyang abilidad ang kinamaguwangang anak ni Seigfred nga si Earl Jean Brylle Ornopia, kinsa maoy misakmit sa mini class category, gisundan nila ni BJ Pepito, anak ni event organizer Malou Pepito ug Tomtom Largosa.

Si Pepito maoy kampiyon sa peewee class. Ang female rider nga si Marianne Yapparcon mao ang second placer, gisundan sa mga igsuon ni Brylle nga sila si Ken Keizer ug Keizer Ornopia ug Kenneth Batolan alang sa top five.

Sila si Aloy Igot ug Felipe Montejo nanghawod usab sa ilang tagsa-tagsa ka dibisyon. Si Igot misakmit sa Executive-B, samtang si Montejo maoy mibira sa Executive-C.     (BANAT NEWS)