3-0 tuyo sa UC Webmasters

CEBU, Philippines - Pagkulit og 3-0 maoy tuyo sa University of Cebu (UC) Webmasters sa ilang pakigsangka sa University of Southern Philippines Foundation (USPF) Panthers sa pagpadayon sa 9th Cebu Schools Athletic Foundation Inc. (CESAFI) basketball event karong gabii diha sa Cebu Coliseum.

MGA DUWA KARON

(Cebu Coliseum)

 4:30 pm

USPF vs. USC (Jrs.)

 6:00 pm

USPF vs. UC (Srs.)

Ang USPF bantams makigharong sab karon batok sa University of San Carlos (USC) Baby Warriors alang sa pasiunang duwa nga gikatakda sa alas-4:30 sa hapon.

Ang USPF bantams tinguhang mobangon human sila pahamtangi og 86-94 nga kapildihan batok sa Sacred Heart School-Jesuits (SHS-J) Eaglets.

Hinuon, ang USC Baby Warriors naihaw sab atol sa ilang debut batok sa UC Junior Webmasters, 86-95.

Dili malalis nga ang UC Webmasters kanunay magsandig sa kiliran sa ilang 6-foot-9 center nga si June Mar Fajardo, kinsa maoy nagdala og kahayag ug paglaum sa maong koponan.

Mao kini ang numero unong suliran nga angay'ng sulbaron ni coach Raul Latonio Sr. sa USPF Panthers.

Walay laing anaa sa hunahuna karon ni coach Latonio kun dili mao ang pagpaduwa ni Renato Gulane. Nasayran, si Gulane gidid-an sa pagpaduwa sa screening committee tungod sa isyu sa pangedaron sa wala pa ang Panthers modaog sa overtime sa iskor, 88-83 batok sa DBTC Greywolves.   (BANAT NEWS)