Jaguars nakalingkawas sa ikaduhang overtime

CEBU, Philippines - Ang power forward nga si Edwin Bibera miburak og 30 puntos, 15 niini gikan sa fourth period aron pangulohan ang   University of San Jose-Recoletos (USJR) Jaguars sa nagpadayong aksiyon sa 9th Cebu Schools Athletic Foundation Inc. (CESAFI) basketball season.

Apan nanginahanglan pa sila og duha ka overtime una nila mabuntog ang lig-ong kontender Southwestern University (SWU) Cobras sa iskor nga 90-86 niadtong Huwebes sa gabii diha sa Cebu Coliseum.

Si Bibera, kinsa moduwa usahay sa sentro puli ni Kurt Amores, maoy naghatag sa Jaguars og 60-51 nga labaw sa nahabiling 4:15 sa regulasyon. Apan kalit lang nangisog ang Cobras ug mipabuhagay kini’g 16-7 nga rally lakip na sunod-sunod nga 11 puntos ni Eliud Poligrates aron tablahon ang iskor sa 67-all aron ihatod ang duwa ngadto sa first overtime.

 Atol sa first overtime, milabaw og dos puntos ang Jaguars human sa 3-point shot ni Bibera, 77-75 sa nahabiling 22 segundos. Apan gisuklian sab sila og 3-point shot kortesiya ni Chris Litorja nga naghatag sa Cobras og

uno punto nga bentaha, 75-74.

Ang Cobras may higayon unta nga maoy modaog   human ang point guard sa USJ-R nga si Edmar Pateño , misipyat  sa iyang duha ka free throws sa nahabiling 12.3 segundos diin ang Cobras nabiyaan lang og usa ka palito, 76-77.

Ang Cobras kinahanglan mo-iskor og dos puntos aron modaog, apan si Poligrates misipyat og usa sa duha niya ka free throws sa katapusang 7.8 nga miresulta sa panagtabla, 77-all aron ihatod ang duwa ngadto sa ikaduhang overtime.

Nanginit ang Jaguars sa ikaduhang overtime ug milabaw kini'g sayes puntos, 87-81 sa nahabiling 51 segundos sa duwa. Bisan pa niini, ang Cobras wala mopakita'g kaluya ug pinaagi sa kaabtik ni Gilbert Gallarde, kinsa mi-iskor og lima ka sunod-sunod nga puntos, nahilis ang labaw ngadto na lang sa uno punto sa iskor nga 86-87 sa nahabiling 24 segundos.

Ang katapusang tulo ka free throws gikan nila ni Medjet dela Rama ug Pateño maoy nakapaginhawa og lawom sa Jaguars.

Si Jerome Villaver mibugha og 14 puntos alang sa Jaguars, kinsa nakig-uban sa UC Webmasters sa labing taas nga dapit sa standings sa managsamang 2-0 win-loss records.

Sila si Poligrates ug Eleazar Armecin maoy nangulo sa   Cobras nga parehong miantog og 21 puntos, gisundan ni Gallarde nga adunay 13 puntos.

Puntos Matag Usa

USJ-R (90) - Bibera 30, Villaver 14, Amores 9, Lapiz 8, Suliman 8, Dela Rama 7, Dela Peña 6, Alquizola 1, Duran 1, Nudalo 1

SWU (86) - Poligrates 21, Armecin 21, Gallarde 13, Pacquiao 10, Jalandoni 9, Pria 6, Litorja 6. - – BANAT NEWS