Hinagpatay Visayas elimination himuon ugma sa AVGC

CEBU, Philippines - Himuon na ugma ang pagpili og mga atleta nga morepresentar sa Visayas alang sa Milo Junior Tennis National Championships diha sa Alta Vista Golf and Country Club.

Niadtong interesadong moapil sa torneyo gihatagan lamang hangtod karong alas-5 sa hapon sa pagparehistro ning duha ka adlaw nga regional elimination.

Ang kalihukan gibuwag ngadto sa tulo ka age brackets -- unisex 10-under ug boys and girls 12-and 14-under.

Ang mga mananaog sa Visayas elimination makigsangka batok sa mga napili gikan sa Mindanao, Luzon ug sa National Capital Region (NCR) karong Oktubre didto sa kaulohan.

Ang mamahimong national champion maoy morepresentar sa nasud alang sa tennis circuit didto sa Malaysia nga gikatakda sa nanghinapos nga bahin ning tuiga.

Alang sa dugang mga kasayoran, mahimong motawag ni local coordinator Fritz Tabura sa 0920-2142593. – BANAT NEWS