Phelps daog na sab sa 100 butterfly

CEBU, Philippines - Midaog na sab ang U.S. Olympic gold medalist swimmer nga si Michael Phelps batok kang Milorad Cavic sa Serbia, ang swimmer nga iyang gipilde atol sa Beijing Olympics.Human ibugwak ang tubig, migunit dayon si Phelps sa lane rope, misukmag-sukmag sa hangin ug dayon bingat sa iyang swimsuit.

Ang mensahe tatak kaayong nagpasabot: Don’t mess with Michael Phelps.

Misuway si Cavic paghaw-as sa iyang ulo nga milingi sa iyang likod ug napilde na sab kang Phelps nga maoy iyang kontra didto sa Beijing Olympics.

“There are always things that fire me up and motivate me,” matud pa ni Phelps kaniadtong Sabado human siya mahimong unang swimmer nga maoy nakabuak sa 50 segundos sa 100-meter butterfly. “That’s just how I tick.”

Sikit kaayo sila si Cavic ug Phelps kinsa mibuylo ug mi-rally sa pagbalik aron pakgangon si Cavic sa usa ka makapakurat nga 49.82 ang oras atol sa world swimming championships didto sa Rome, Italy. Nabuak sab ni Cavic ang 50 segundos sa iyang oras nga 49.95 apan igo lang sa silver medal ang iyang paningkamot ug napugos og sagang sa mga pagtamay.

Dili gani kaayo sikit ang iyang oras dihang napilde si Cavic didto sa Beijing Olympics sa miaging tuig dihang midaog si Phelps kapin sa one-hundredth of a second sa iyang pag-ani og walo ka gold medals ug nangangkon si Cavic nga siya maoy unang miabot.

“That satisfied me a little bit,” mikomedya si Phelps ngadto kang Cavic. “I set it up perfectly,” dugang pa niya.

Si Phelps milayat sa pisi nga nag-uwang kanila ni Cavic nga nagtinan-away ug pinagawas ang suwang sa pool ug mi-inat sa duha ka kilid sa iyang gigamit nga hugot kaayong LZR Racer swimsuit agi'g pagpasuya ngadto kang Cavic nga gusto niyang tanyagan paggamit og kusog nga polyurethane suits aron dili siya makapasangil kung mapilde siya ginamit ang Speedo.

Matud pa ni Cavic nga dili na kini kinahanglan ug si Phelps naka-uyon ra usab sa iyang gisul-ob.

“I’ve never seen him that emotional,” matud pa sa coach ni Phelps nga si Bob Bowman.

Naglamanohay ra hinuon sila si Phelps ug Cavic.

“He congratulated me and kind of smiled a bit, but I have a feeling that our battle is going to go back and forth for a while,” matud pa ni Phelps.

Si Cavic nagkanayon ngadto kang Phelps: “You’re the man.”

Matud pa ni Cavic “He just looked at me and smiled. He knows it.”

Atol sa usa ka halandumong sangka didto sa Beijing, si Phelps mihimo’g duol na sa imposibleng kadaogan sa final half-stroke aron pagpukan kang Cavic sa usa ka sikit kaayong margin.

Kung wala pa kadto mahitabo, dili unta mabuak ni Phelps ang record ni Mark Spitz kinsa maoy kanhi record holder sa pinakadaghan og gold medals sa usa ka swimming event.

Naglagot si Cavic sa maong kapildehan ug sa iyang pagtuo siya ang unang miabot apan hinay niyang napislit ang touchpad ug mas kusog nga mituplok si Phelps kinsa mibanda didto sa bungbong sa pool.

Apan bisan pa niana, ang electronic ug ang photographic evidence nagpakita nga si Phelps ang midaog ug si Cavic nagsige og pangangkon sa pag-abot niya sa Rome. - Gabby G. Malagar (BANAT NEWS)