9th CESAFI season buksan na karon

CEBU, Philippines - Magtakus sa ilang abilidad ang University of San Jose-Recoletos (USJ-R) Jaguars ug ang University of San Carlos (USC) Warriors sa pagsugod sa 9th Cebu Schools Athletic Foundation, Inc. (CESAFI) season karong adlawa diha sa Cebu Coliseum.

Mga Duwa Karon (Cebu Coliseum)

1:00 pm Opening Ceremony

4:00 pm  USPF vs. SHS (Secondary)
5:30 pm  USJ-R vs. USC (Collegiate)

Ang USJ-R Jaguars, kinsa maoy runner-up sa miaging tuig ug ang third placer nga USC Warriors parehong malaumon nga ilang sugdan ang bag-ong  season sa hustong direksiyon bisan pa og adunay daghang rookies sa matag habig.

Mag-abot ang Jaguars ug ang Warriors human sa engkuwentro sa high school tali sa University of Southern Phlippines Foundation (USPF) Baby Panthers ug sa Sacred Heart School-Jesuits (SHS-J) Eaglets.
Ang USJ-R Jaguars nagbaton og pito ka rookies, samtang nakabentaha ang USC Warriors nga aduna lamang kini tulo ka bag-ong players.

Malaumon ang USJ-R Jaguars nga ang ilang nahibiling players sa miaging tuig maoy mogiya sa mga rookies ug usa sa ilang gisaligan mao si Kurt Amores, kinsa maoy ilang pambato sa ilawom.

Apan daku kaayo ang iyang tahas nga sagubangon ilabi na kun ila nang ikabagat ang mas tag-as ug multi-titled University of the Visayas (UV) Green Lancers ug ang University of Cebu (UC) Webmasters.

Si Ryan Carlo Padayao mobalik sab alang sa USC Warriors human siya wala makaduwa sa miaging tuig ug moabag kini sa opensa uban nilang Sam Hermosa, Giovanni Padillo ug Gino Gallarde.

Si Amores pagaabagan sab sa   sentro niining si Joven Cid Cortes ug ingon man nila ni Edmar Pateño, Jerome Villaver, Marvin Duran ug Edwin Bibera isip mga starters.

Sila si Amores ug Cortes mas gamay hinuon itandi ni 6-foot-11 Gregory Slaughter sa UV Green Lancers ug ni 6-foot-9 June Mar Fajardo sa UC Webmasters, apan nag-anam sab og umento ang ilang dinuwa-an tungod sa kanunay nilang pagsalmot sa mga torneyo gawas sa CESAFI human sa offseason.

Ang USJ-R Jaguars pagalangkuban nilang Aniceto Lapiz, Jr., Abolaiz Suliman, Jaymar dela Peña ug rookies Carlo Albarillo, Joel Alquizola, Midjet dela Rama, Jason Nudalo, Dindo Pacinio, Christian Senining ug Aaron Tiong.

Sa laing bahin, mokompleto sa line-up sa USC Warriors mao sila si Paul Joven, Luigi Bercede, Michael Cantonao, Alfred Vitug, Eddie Bakker, Robert Gines Codilla ug rookies Nilton Otida, Mark Panerio ug si Mel Duran. – BANAT NEWS