Lady Snipers misakmit sa korona

CEBU, Philippines – Ang Island Bay Lady Snipers mibawos ngadto sa Borge Family, 38-26 aron sakmiton ang korona sa Inter-Barangay Women's Basketball Tournament niadtong Sabado didto sa sitio Taliwambus sa barangay Esperanza, lungsod sa San Francisco Camotes, Cebu.

Ang Lady Snipers ni team owner Bruce Cunningham nasugamak sa Borge Family sa opening round, apan nakabawi kini sa kampiyonato human makapakita og maayong labok.

Migamit og hugot nga depensa si coach Jeffrey Donaire sa Lady Snipers aron pakgangon ang scoring leader sa Borge Family nga si Rhymee Beth Formentera.

Si Aileen Estrera, kinsa maoy nangulo sa Lady Snipers sa iyang 19 puntos, maoy mipugong kang Formentera, kinsa nalimitahan lang sa nuybe puntos ug ubos kaayo sa iyang 25 puntos nga nahipos sa una nilang panagbagat.

Ang darling of the crowd nga si Estrera, giabagan sa iyang manghod nga si Jessica, kinsa miamot og 10 puntos. – BANAT NEWS